നീറ്റ് പരീക്ഷ എഴുതാൻ ജാമ്യം വേണം; അപേക്ഷയുമായി പുൽവാമ ഭീകരാക്രമണ കേസിലെ പ്രതി 

ന്യൂഡൽഹി: നാഷണൽ എലിജിബിലിറ്റി കം എൻട്രൻസ് ടെസ്റ്റിന് (നീറ്റ്) ഹാജരാകാൻ ജാമ്യം വേണമെന്ന ആവശ്യവുമായി പുൽവാമ ഭീകരാക്രമണ കേസിലെ പ്രതി. കേസിലെ പ്രതികളിലൊരാളായ വൈസുൽ ഇസ്ലാം ആണ് ജാമ്യാപേക്ഷ സമർപ്പിച്ചത്. ജ്യാമ്യാപേക്ഷ മറ്റന്നാൾ പരി​ഗണിക്കും.  അപേക്ഷയെ എതിർക്കുമെന്നും ദേശീയ അന്വേഷണ ഏജൻസി അഭിഭാഷകൻ വിപിൻ കൽറയെ ഉദ്ധരിച്ച് വാർത്താ ഏജൻസിയായ എഎൻഐ റിപ്പോർട്ട് ചെയ്തു. 

പുൽവാമ ഭീകരാക്രമണ കേസിൽ ഓഗസ്റ്റ് 25-ന് ദേശീയ അന്വേഷണ ഏജൻസി(എൻ.ഐ.എ.)  കുറ്റപത്രം സമർപ്പിച്ചിരുന്നു. കേസിലെ അടുത്ത വാദം സെപ്റ്റംബർ 15-ന് നടക്കും. പാക്കിസ്താന്റെ നിർദേശപ്രകാരം ബോംബാക്രമണം നടത്തിയെന്നാരോപിക്കപ്പെടുന്ന 19 പേരുടെ പേരാണ് കുറ്റപത്രത്തിലുള്ളത്.