പരക്കെ അക്രമത്തിന് സാധ്യത ; ജാഗ്രത പാലിക്കാന്‍ സംസ്ഥാനങ്ങള്‍ക്ക് ആഭ്യന്തര മന്ത്രാലയത്തിന്റെ നിര്‍ദ്ദേശം

ന്യൂഡല്‍ഹി : വോട്ടെടുപ്പിനോട് അനുബന്ധിച്ച് രാജ്യത്ത് പരക്കെ അക്രമ സംഭവങ്ങള്‍ ഉണ്ടാകാന്‍ സാധ്യതയുണ്ടെന്ന് കേന്ദ്ര ആഭ്യന്തര മന്ത്രാലയത്തിന്റെ മുന്നറിയിപ്പ്. ഇക്കാര്യം വ്യക്തമാക്കി എല്ലാ സംസ്ഥാനങ്ങളിലെയും ചീഫ് സെക്രട്ടറിമാര്‍, പൊലീസ് മേധാവിമാര്‍ എന്നിവര്‍ക്ക് മന്ത്രാലയം പ്രത്യേക ജാഗ്രതാ നിര്‍ദ്ദേശം നല്‍കിയിട്ടുണ്ട്. പ്രശ്‌ന ബാധിത പ്രദേശങ്ങളില്‍ കൂടുതല്‍ സേനയെ വിന്യസിക്കണമെന്നും പരമാവധി അനിഷ്ട സംഭവങ്ങള്‍ ഒഴിവാക്കണെന്നും കേന്ദ്രഭരണ പ്രദേശങ്ങളോടും സംസ്ഥാനങ്ങളോടും ആവശ്യപ്പെട്ടു.

വോട്ടെടുപ്പ് സമാധാനമായി പൂര്‍ത്തിയാക്കുന്നതിനുള്ള എല്ലാ സൗകര്യങ്ങളും സേനകള്‍ ഒരുക്കണമെന്നും ക്രമസമാധാന പാലനത്തില്‍ വീഴ്ച വരാതെ ശ്രദ്ധിക്കണമെന്നും നിര്‍ദ്ദേശത്തില്‍ പറയുന്നു. വോട്ടെണ്ണല്‍ പൂര്‍ത്തിയായി ഔദ്യോഗിക ഫലപ്രഖ്യാപനം വരുന്നത് വരെ കരുതല്‍ വേണമെന്നും ആഭ്യന്തരമന്ത്രാലയം വ്യക്തമാക്കി. 

കേരളത്തില്‍ മാത്രം 22,640 ലേറെ പൊലീസുകാരെയാണ് ക്രമസമാധാന പാലനത്തിനായി നിയോഗിച്ചിരിക്കുന്നത്. ഇതിന് പുറമേ സായുധ സേനയില്‍ നിന്ന് 1344 ഉദ്യോഗസ്ഥര്‍ക്കും ഡ്യൂട്ടി നല്‍കിയിട്ടുണ്ട്.