ബന്ധുവിനൊപ്പം ഒളിച്ചോടി, പെണ്‍കുട്ടിയെ പരസ്യമായി തല്ലിച്ചതച്ച് 70കാരന്‍; ഖാപ് പഞ്ചായത്തിന്റെ ക്രൂരത

ഹൈദരാബാദ്: ബന്ധുവായ യുവാവുമായി ഒളിച്ചോടി എന്ന കാരണത്താല്‍ പ്രായപൂര്‍ത്തിയാകാത്ത പെണ്‍കുട്ടിയെ പരസ്യമായി തല്ലുന്ന ദൃശ്യങ്ങള്‍ പുറത്ത്. 17 വയസ്സുള്ള പെണ്‍കുട്ടിയെ 70കാരനായ ആള്‍ വടികൊണ്ട് തല്ലിച്ചതക്കുന്നതാണ് ദൃശ്യങ്ങളിലുളളത്. ആന്ധ്രാ പ്രദേശിലെ അനന്ത്പൂര്‍ ജില്ലയിലാണ് സംഭവം നടന്നത്. 

ബുധനാഴ്ചയാണ് സംഭവം ഉണ്ടായത്. ഖാപ് പഞ്ചായത്തിനിടെയാണ്  ക്രൂരത അരങ്ങേറിയത്.പെണ്‍കുട്ടിയും 20 വയസ്സുകാരനായ യുവാവും കുറച്ചുനാളായി പ്രണയത്തിലായിരുന്നു. ഇതിനിടെ ഇരുവരും ഒളിച്ചോടി. ഇവരെ കണ്ടെത്തിയ ബന്ധുക്കള്‍ ഖാപ് പഞ്ചായത്തില്‍ എത്തിക്കുകയായിരുന്നു. ബന്ധം അവസാനിപ്പിക്കാന്‍ ഖാപ് പഞ്ചായത്ത്  ഇരുവര്‍ക്കും മുന്നറിയിപ്പ് നല്‍കി. ഇത് നിരസിച്ചതോടെ തല്ലിച്ചതയ്ക്കുകയായിരുന്നു.

പെണ്‍കുട്ടിയെയും ബന്ധുവായ യുവാവിനെയും വലിച്ചിഴച്ച് മര്‍ദ്ദിക്കുന്നതാണ് ദൃശ്യങ്ങളിലുളളത്. ഗ്രാമത്തിനും ഇവരുടെ കുടുംബങ്ങള്‍ക്കും ചീത്തപ്പേര് കേള്‍പ്പിച്ചു എന്ന കാരണത്താലാണ് ഈ ക്രൂരത നടത്തിയിരിക്കുന്നത്. 

ലിംഗപ്പ എന്നയാളാണ് ഇവരെ  മര്‍ദ്ദിക്കുന്നത്. പെണ്‍കുട്ടിയും യുവാവും ഒളിച്ചോടിയ വിവരം പെണ്‍കുട്ടിയുടെ പിതാവാണ് ലിംഗപ്പയെ അറിയിച്ചത്. ഈ സാഹചര്യത്തിലാണ് ലിംഗപ്പ പഞ്ചായത്ത് വിളിച്ചുകൂട്ടുകയും ഇവരെ മര്‍ദ്ദിക്കുകയുമായിരുന്നു.