ബഹുഭാര്യാത്വത്തിന്റെ ഭരണഘടനാ സാധുത പരിശോധിക്കും: സുപ്രിം കോടതി

ന്യൂഡല്‍ഹി: മുസ്ലിം സമുദായത്തിലെ ബഹുഭാര്യാത്വം, നിക്കാഹ് ഹലാല എന്നിവയുടെ ഭരണഘടനാ സാധുത പരിശോധിക്കാമെന്ന് സുപ്രീം കോടതി. ഇതു സംബന്ധിച്ച് കേന്ദ്രത്തിനും നിയമ കമ്മിഷനും നോട്ടീസ് അയയ്ക്കാന്‍ കോടതി നിര്‍ദേശിച്ചു. ബഹുഭാര്യാത്വവും നിക്കാഹ് ഹലാലയും നിയമവിരുദ്ധമായി പ്രഖ്യാപിക്കണമെന്ന് ആവശ്യപ്പെടുന്ന ഒരുകൂട്ടം ഹര്‍ജികള്‍ പരിഗണിച്ചുകൊണ്ടാണ് കോടതി നടിപടി. 

ഒരു ഭാര്യ ഉണ്ടായിരിക്കെ മുസ്ലിം പുരുഷന്‍മാര്‍ മറ്റു വിവാഹം കഴിക്കുന്നതാണ് ബഹുഭാര്യാത്വം. ഒരു സ്ത്രീക്ക് വിവാഹ മോചനം നേടിയ ആദ്യ ഭര്‍ത്താവിനെ വീണ്ടും വിവാഹം കഴിക്കാന്‍ ഇടയ്ക്കു മറ്റൊരാളെ വിവാഹം കഴിച്ച് ത്വലാഖ് ചൊല്ലണമെന്നതാണ് നിക്കാഹ് ഹലാല. 

പുരുഷന് ഒന്നിലേറെ വിവാഹം കഴിക്കാന്‍ അനുമതി നല്‍കുന്ന ഇസ്ലാമിക നിയമം സത്രീക്ക് ഇത്തരമൊരു അനുമതി നല്‍കുന്നില്ലെന്ന് ഹര്‍ജികളില്‍ ചൂണ്ടിക്കാട്ടിയിട്ടുണ്ട്. മുസ്ലിം സ്ത്രീകളുടെ മൗലിക അവകാശത്തെ ഹനിക്കുന്നതാണ് വ്യക്തി നിമയത്തിലെ ഈ വകുപ്പെന്ന് ഹര്‍ജിക്കാര്‍ വാദിക്കുന്നു.