ബാലറ്റ് പേപ്പര്‍ മതി: കര്‍ണാടക മുഖ്യമന്ത്രി കമ്മിഷന് കത്തെഴുതും

ബംഗളൂരു: കര്‍ണാടക നിയമസഭാ തെരഞ്ഞെടുപ്പില്‍ വോട്ടിങ് യന്ത്രം ഉപേക്ഷിച്ച് ബാലറ്റ് പേപ്പര്‍ ഉപയോഗിക്കാന്‍ തെരഞ്ഞെടുപ്പു കമ്മിഷനോട് ആവശ്യപ്പെടുമെന്ന് മുഖ്യമന്ത്രി സിദ്ധരാമയ്യ. വോട്ടിങ്  യന്ത്രങ്ങളുടെ പ്രവര്‍ത്തനത്തെക്കുറിച്ച് ഒട്ടേറെ സംശയങ്ങള്‍ ഉയരുന്നുണ്ടെന്ന് അദ്ദേഹം ചൂണ്ടിക്കാട്ടി. ഈ സാഹചര്യത്തില്‍ കര്‍ണാടകത്തില്‍ ബാലറ്റ് പേപ്പര്‍ ഉപയോഗിക്കാന്‍ കമ്മിഷനോട് ആവശ്യപ്പെടും. ഇക്കാര്യത്തില്‍ കമ്മിഷന് കത്തെഴുതുമെന്ന് സിദ്ധരാമയ്യ റായ്ച്ചൂരില്‍ മാധ്യമ പ്രവര്‍ത്തകരോടു പറഞ്ഞു.

തെരഞ്ഞടുപ്പു കമ്മിഷന്‍ ഭരണഘടനാപരമായി സ്വതന്ത്രസ്ഥാപനമാണ്. എന്നാല്‍ ബിജെപി അവര്‍ക്ക് ആവശ്യമുള്ളവരെയാണ് അവിടെ നിയമിക്കുന്നത്. അവരാണ് തെരഞ്ഞെടുപ്പ് കമീഷനെപ്പോലും നിയമിക്കുന്നതെന്നും സിദ്ധരാമയ്യ കുറ്റപ്പെടുത്തി.

ഇലക്ട്രോണിക് വോട്ടിങ് യന്ത്രത്തില്‍ കൃത്രിമം നടത്താമെന്ന വാദത്തില്‍ കൂടുതല്‍ അന്വേഷണം നടത്തണം. പഴയതുപോലെ ബാലറ്റ് പേപ്പറുകളിലേക്ക് പോകുന്നതില്‍ എന്താണ് ബുദ്ധിമുട്ടെന്നും അദ്ദേഹം ചോദിച്ചു.