ബിജെപി നേതാവ് ബലാത്സംഗം ചെയ്തു, പരസ്യമായി തല മുണ്ഡനം ചെയ്ത് ദലിത് യുവതിയുടെ പ്രതിഷേധം (വിഡിയോ)

ലക്‌നൗ: ബിജെപി നേതാവ് ബലാത്സംഗം ചെയ്‌തെന്ന് ആരോപിച്ച് പരസ്യമായി തല മുണ്ഡനം ചെയ്ത് ദലിത് യുവതിയുടെ പ്രതിഷേധം. ഉത്തര്‍പ്രദേശിലാണ് ബിജെപി നേതാവിനെതിരെ ഗുരുതര ആരോപണം ഉന്നയിച്ച് യുവതി രംഗത്തുവന്നത്.

സതീശ് ശര്‍മ എന്ന ബിജെപി നേതാവ് തന്റെ നഗ്ന വിഡിയോ ചിത്രീകരിച്ച ശേഷം മൂന്നു വര്‍ഷമായി ഭീഷണിപ്പെടുത്തി പീഡിപ്പിക്കുകയാണെന്നാണ് യുവതിയുടെ ആരോപണം. ഇയാളുടെ ചെയ്തികളില്‍ മനം മടുത്ത് സഹായത്തിനായി പൊലീസിനെ സമീപിച്ചെങ്കിലും ഫലമുണ്ടായില്ല. സതീശ് ശര്‍മയില്‍നിന്നു പണം വാങ്ങിയ പൊലീസുകാര്‍ തന്റെ പരാതി മുക്കുകയായിരുന്നെന്ന് യുവതി ആരോപിക്കുന്നു.

ബിജെപി നേതാവിന്റെ പ്രവൃത്തിയിലും പൊലീസുകാരുടെ നിസ്സംഗതയിലും പ്രതിഷേധിച്ച് തനിക്ക് ഇതേ ചെയ്യാനുള്ളൂ എന്നു പറഞ്ഞുകൊണ്ടാണ് യുവതി വാര്‍ത്താ സമ്മേളനത്തില്‍ പരസ്യമായി തല മുണ്ഡനം ചെയ്തത്. ദലിത് വിഭാഗത്തില്‍നിന്നുള്ളയാള്‍ ആയതുകൊണ്ടാണ് തനിക്ക് ഇത്തരത്തില്‍ ദുരനുഭവമുണ്ടായതെന്ന് അവര്‍ പറഞ്ഞു.