ബിജെപി യുവനേതാവ് പീഡിപ്പിച്ചു; ആരോപണവുമായി മോഡല്‍

ഹൈദരബാദ്: തെലങ്കാനയില്‍ കൂട്ടബലാത്സംഗത്തിന് ശേഷം ക്രൂരമായി കൊല്ലപ്പെട്ട പെണ്‍കുട്ടിക്ക് നീതിലഭിക്കണമെന്നാവശ്യപ്പെട്ട് പ്രക്ഷോഭം നയിച്ച ബിജെപി യുവനേതാവിനെതിരെ ലൈംഗികാരാപോണവുമായി മോഡലായ യുവതി രംഗത്ത്.ഹൈദരബാദിലെ യുവനേതാവും ഭാരതീയ ജനതാ യുവമോര്‍ച്ചാ നേതാവുമായ ആശിഷ് ഗൗഡിനെതിരെയാണ് ആരോപണം. മുന്‍ എംഎല്‍എ നന്ദേശ്വര്‍ ഗൗഡിന്റെ മകനാണ് ആരോപണവിധേയന്‍.

യുവതിയുടെ പരാതിയുടെ അടിസ്ഥാനത്തില്‍ ഞായറാഴ്ചയാണ് പൊലീസ് കേസ് രജിസ്റ്റര്‍ ചെയ്തത്. ഹൈദരബാദിലെ ഒരു പബ്ബില്‍ വെച്ചാണ് മോഡലിനെ ഉപദ്രവിച്ചതെന്നാണ് പരാതിയില്‍ പറയുന്നത്. ഈ സമയത്ത് യുവനേതാവിനൊപ്പം രണ്ട് സുഹൃത്തുക്കളും ഉണ്ടായിരുന്നുവെന്നും പരാതിയില്‍ പറയുന്നു.

കഴിഞ്ഞ വ്യാഴാഴ്ച രാവിലെയാണ് ഹൈദരാബാദിന്റെ പ്രാന്തപ്രദേശത്ത് വനിതാ ഡോക്ടര്‍ ബലാത്സംഗത്തിന് പിന്നാലെ ക്രൂരമായി കൊല്ലപ്പെട്ടത്. ഈ സംഭവത്തില്‍ രാജ്യമാകെ വ്യാപക പ്രതിഷേധം അലയടിക്കുകയാണ്. അതിന് പിന്നാലെയാണ് ബിജെപി യുവനേതാവിന്റെ പീഡനം വാര്‍ത്തകളില്‍ ഇടംപിടിക്കുന്നത്.