ബിഹാറില്‍ മിന്നലേറ്റ് 18 മരണം, മരണസംഖ്യ ഇനിയും ഉയര്‍ന്നേക്കുമെന്ന് മുന്നറിയിപ്പ്‌

പാറ്റ്‌ന: ബിഹാറില്‍ ഇടിമിന്നലേറ്റ് 18 മരണം. ഏഴ് ജില്ലകളിലായാണ് ശക്തമായ ഇടിമിന്നലില്‍ 18 പേര്‍ക്ക് ജീവന്‍ നഷ്ടമായത്. കനത്ത മഴയോടൊപ്പം ഇടിമിന്നലും ശക്തമാവുകയായിരുന്നു. 

ഇടിമിന്നലില്‍ നിരവധി പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. മരണ സംഖ്യ ഇനിയും ഉയരാന്‍ സാധ്യതയുണ്ടെന്നാണ് സംസ്ഥാന ദുരന്ത നിവാരണ അതോറിറ്റി അറിയിച്ചത്. 

ചൊവ്വാഴ്ച മുതലായിരുന്നു ബിഹാറില്‍ മഴയും ഇടിമിന്നലും ശക്തമായത്. മിന്നലേറ്റ് മരിച്ചവരുടെ കുടുംബങ്ങള്‍ക്ക് സര്‍ക്കാര്‍ നാല് ലക്ഷം രൂപ ധനസഹായം പ്രഖ്യാപിച്ചു. രാജ്യത്ത് ഈ വര്‍ഷം ഏപ്രില്‍ മുതല്‍ ജൂലൈ വരെ 1311 പേര്‍ ഇടിമിന്നലേറ്റ് മരിച്ചതായാണ് സര്‍ക്കാര്‍ കണക്ക്.