മരണത്തിന്റെ തൊപ്പി; മേഘാലയയില്‍ വിഷക്കൂണ്‍ കഴിച്ച് ആറു പേര്‍ മരിച്ചു

ഷില്ലോങ്: മേഘാലയയില്‍ വിഷക്കൂണ്‍ കഴിച്ച് ആറു പേര്‍ മരിച്ചു. വെസ്റ്റ് ജയിന്റിയ ഹില്‍സ് ജില്ലയിലാണ് ദുരന്തമുണ്ടായത്.

പതിനാലു വയസുള്ള പെണ്‍കുട്ടിയടക്കം ആറു പേരാണ് കൂണില്‍ നിന്നുള്ള വിഷബാധയേറ്റു മരിച്ചത്. കാട്ടില്‍ നിന്നു ശേഖരിച്ച കൂണ്‍ ഇവര്‍ പാചകം ചെയ്ത് ഉപയോഗിക്കുകയായിരുന്നു.

അമാനിറ്റ ഫലോയ്ഡ്‌സ് എന്ന വിഷക്കൂണാണ് ഇവര്‍ കഴിച്ചതെന്നു കണ്ടെത്തിയിട്ടുണ്ട്. മരണത്തിന്റെ തൊപ്പി (ഡെത്ത് കാപ്) എന്നാണ് ഇത് അറിയപ്പെടുന്നത്. നേരിട്ട് കരളിനെ ബാധിക്കുന്നതാണ് ഇതിലെ വിഷാംശമെന്ന് ആരോഗ്യവകുപ്പ് അധികൃതര്‍ പറഞ്ഞു.

ഇവരുടെ കുടുംബാംഗങ്ങളായ പതിനെട്ടു പേര്‍ക്കു കൂടി വിഷക്കൂണ്‍ കഴിച്ച് അസ്വസ്ഥതകളുണ്ടായി. തലകറക്കം, ഛര്‍ദി എന്നിവ വന്നതിനെത്തുടര്‍ന്നാണ് ആശുപത്രിയില്‍ പ്രവേശിപ്പിച്ചത്.