സഹോദരിക്കു നേര്‍ക്ക് മോശം കമന്റ്; ഇ-റിക്ഷ ഡ്രൈവറെ സഹോദരനും സുഹൃത്തും ചേര്‍ന്ന് അടിച്ചുകൊന്നു 

ന്യൂഡല്‍ഹി: സഹോദരിയുടെനേരെ മോശം കമന്റ് പറഞ്ഞ ഇലക്ട്രിക് റിക്ഷ ഡ്രൈവറെ സഹോദരനും സുഹൃത്തും ചേര്‍ന്ന് അടിച്ചുകൊന്നു. സൗത്ത്ഈസ്റ്റ് ഡല്‍ഹിയിലെ ജയ്പൂര്‍ പ്രവിശ്യയിലാണ് സംഭവം. ജഗദീഷ് എന്ന 35കാരനായ റിക്ഷ ഡ്രൈവറാണ് കൊല്ലപ്പെട്ടത്.

സംഭവത്തില്‍ ആമിര്‍(24), സക്കിര്‍(19) എന്നിവരെ പൊലീസ് അറസ്റ്റു ചെയ്തു. ആമിറിന്റെ സഹോദരിക്കുനേരെ മോശമായി കമന്റുകള്‍ പറഞ്ഞതിനാണ് ഇരുവരും ചേര്‍ന്ന് ജഗദീഷിനെ മര്‍ദ്ദിച്ചതെന്ന് പൊലീസ് പറഞ്ഞു.

സഹോദരിയെ സന്ദര്‍ശിച്ച് മടങ്ങുംവഴി ജഗദീഷിനെ കണ്ട ഇവര്‍ തമ്മില്‍ വാക്കേറ്റമുണ്ടാകുകയായിരുന്നു. തുടര്‍ന്ന് ജഗദീഷിനെ ആമിറും സക്കീറും ചേര്‍ന്ന് മര്‍ദ്ദിച്ചു. അടികൊണ്ട് നിലത്തുവീണ ജഗദീഷിനെ ഉടന്‍തന്നെ ആശുപത്രിയില്‍ എത്തിക്കാന്‍ ശ്രമിച്ചെങ്കിലും ജീവന്‍ രക്ഷിക്കാനായില്ല. ആശുപത്രിയിലെത്തുന്നതിനു മുമ്പേ ജഗദീഷിന്റെ ജീവന്‍ നഷ്ടപ്പെട്ടിരുന്നെന്നാണ് ദൃക്‌സാക്ഷികള്‍ പറയുന്നത്.