ചോറ്റാനിക്കര മകം തൊഴല്‍ ഇന്ന് 

ചോറ്റാനിക്കര: ചോറ്റാനിക്കര ദേവീക്ഷേത്രത്തില്‍ മകം തൊഴല്‍ ഇന്ന് നടക്കും. ഉച്ചയ്ക്ക് രണ്ടിനാണ് മകം തൊഴലിനായി നട തുറക്കുക. രാത്രി 8.30 വരെ മകം തൊഴാന്‍ സൗകര്യമുണ്ടാകും. മകം തൊഴലിനായി വിപുലമായ സൗകര്യങ്ങളാണ് കൊച്ചിന്‍ ദേവസ്വം ബോര്‍ഡും ക്ഷേത്ര ഉപദേശക സമിതിയും ഏര്‍പ്പെടുത്തിയിട്ടുള്ളത്. 

മകം നാളില്‍ പ്രത്യേകം തങ്കഗോളകയാണ് ദേവിക്ക് ചാര്‍ത്തുക. രത്‌നങ്ങള്‍ പതിച്ച തങ്കക്കിരീടം, സ്വര്‍ണത്തിന്റെ അഞ്ചുതാലി, മണിമാല, സഹസ്രനാമ മാല, ആയുധമാല, രുദ്രാക്ഷമാല തുടങ്ങി വിശേഷപ്പെട്ട ആഭരണങ്ങളും അണിയിക്കും. പ്രത്യേകം പുഷ്പാലങ്കാരങ്ങളും ഉണ്ടാകും. രാത്രി മകം വിളക്കിനെഴുന്നള്ളിപ്പും നടക്കും.

മകം തൊഴലിനായി ക്ഷേത്രത്തില്‍ പ്രവേശിക്കാന്‍ സ്ത്രീകള്‍ക്കും പുരുഷന്മാര്‍ക്കും പ്രത്യേക ക്യൂവും, വിരിപ്പന്തലും ഒരുക്കിയിട്ടുണ്ട്. തിരക്ക് നിയന്ത്രിക്കാന്‍ ബാരിക്കേഡും സ്ഥാപിച്ചിട്ടുണ്ട്. ഭക്തര്‍ക്ക് ലഘുഭക്ഷണം, ദാഹജലം എന്നിവ വിതരണം ചെയ്യും. സുരക്ഷാ കാര്യങ്ങള്‍ക്കായി വനിതാ പൊലീസുള്‍പ്പെടെ 700  പൊലീസുകാരെ നിയോഗിച്ചിട്ടുണ്ട്. മോഷണം തടയാനായി ക്ലോസ്ഡ് സര്‍ക്യൂട്ട് ക്യാമറകളും സ്ഥാപിച്ചിട്ടുണ്ട്.