തിരുവനന്തപുരം: സംസ്ഥാന സര്ക്കാരിന്റെ നൂറുദിന കര്മപരിപാടിയുടെ ഭാഗമായി നടപ്പാക്കുന്ന പദ്ധതികളില് ആദ്യ ലക്ഷ്യത്തില് റെക്കോര്ഡ് നേട്ടമെന്ന് ഭക്ഷ്യ-സിവില് സപ്ലൈസ് വകുപ്പ്. അരലക്ഷം മുന്ഗണന റേഷന്കാര്ഡുകള് നല്കുന്ന പദ്ധതിയാണു റെക്കോഡ് ലക്ഷ്യം നേടിയത്. അരലക്ഷം കാര്ഡുകള് നല്കാനാണു ലക്ഷ്യമിട്ടതെങ്കിലും 73,024 അപേക്ഷകള് അംഗീകരിച്ചതായി ഭക്ഷ്യമന്ത്രി അനൂപ് ജേക്കബ് അറിയിച്ചു.
76,338 അപേക്ഷകളാണു ലഭിച്ചത്. അതില് 1353 അപേക്ഷകള് മതിയായ രേഖകള് ഹാജരാക്കാന് തിരിച്ചുനല്കി. 2011 എണ്ണം നിരസിച്ചു. പുതിയ 73,024 മുന്ഗണനാ കാര്ഡുകാര്ക്കും ഓഗസ്റ്റ് മൂന്ന് മുതല് സൗജന്യ റേഷന് നല്കിത്തുടങ്ങും. പദ്ധതിയുടെ ഉദ്ഘാടനം മുഖ്യമന്ത്രി വിഡി സതീശന് നിര്വഹിക്കുമെന്ന് മന്ത്രി അറിയിച്ചു.
4068 കിലോലിറ്റര് മണ്ണെണ്ണ അനുവദിച്ചിട്ടുണ്ട്. അടുത്തമാസം ഒന്നുമുതല് എല്ലാ റേഷന് കടകളിലും മണ്ണെണ്ണ ഉറപ്പുവരുത്താന് മന്ത്രി നിര്ദ്ദേശിച്ചു. റേഷന് വാതില്പ്പടി ലോറിക്കാരുമായി കരാര് പുതുക്കല് പരിഗണനയിലുണ്ട്. അവര്ക്കു നല്കാനുള്ള കുടിശ്ശിക വൈകാതെ തീര്ക്കും. സെപ്റ്റംബറില് പുതിയ ടെണ്ടര് ആലോചിക്കും. വിതരണത്തിനായി സ്പെഷല് അരി അടുത്തമാസം പത്തിനകം റേഷന് കടകളിലേക്ക് നല്കും. ഓണക്കാലത്ത് സുഗമമായി പൊതുവിതരണം ഉറപ്പാക്കണമെന്ന് മന്ത്രി ഉദ്യോഗസ്ഥര്ക്കു നിര്ദ്ദേശം നല്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
