7.65 ലക്ഷത്തിന്റെ സ്വർണം കടത്താൻ ശ്രമം; പ്രത്യേക വിമാനത്തിൽ കരിപ്പൂരെത്തിയ യാത്രക്കാരിയെ പിടിച്ചു 

മലപ്പുറം: കോഴിക്കോട് വിമാനത്താവളത്തിലെത്തിയ പ്രത്യേക വിമാനത്തിലെ യാത്രക്കാരിയിൽനിന്നു സ്വർണം പിടിച്ചെടുത്തു. ജിദ്ദയിൽനിന്ന് ഇന്നലെ പുലർച്ചെ കോഴിക്കോടെത്തിയ മലപ്പുറം നന്നമ്പ്ര സ്വദേശിനിയിൽനിന്നാണ് സ്വർണം പിടികൂടിയത്. 7.65 ലക്ഷം രൂപ വിലമതിക്കുന്ന 180 ഗ്രാം സ്വർണമാണ് പിടിച്ചെടുത്തത്. 

24 കാരറ്റിന്റെ സ്വർണം നാല് വളകളുടെ രൂപത്തിലാക്കിയാണു കൊണ്ടുവന്നത്. വളകൾ വസ്ത്രത്തിൽ ഒളിപ്പിച്ചുകടത്താൻ ശ്രമിച്ചെങ്കിലും എയർ‌ കസ്റ്റംസിന്റെ പരിശോധനയിൽ കണ്ടെത്തുകയായിരുന്നു. കോവിഡ് സാഹചര്യം കണക്കിലെടുത്ത് യാത്രക്കാരിയെ വീട്ടിലേക്ക് അയച്ചു.

ഹോം ക്വാറന്റീൻ അവസാനിച്ചശേഷം ചോദ്യം ചെയ്യലിനു ഹാജരാകണമെന്ന വ്യവസ്ഥയിലാണു വിട്ടയച്ചതെന്ന് കസ്റ്റംസ് അധികൃതർ പറഞ്ഞു.