മുല്ലപ്പെരിയാര്‍ ഡാമിലെ 9 ഷട്ടറുകള്‍ ഉയര്‍ത്തി, 7793 ഘനയടി വെള്ളം പുറത്തേയ്ക്ക് ഒഴുക്കുന്നു; പെരിയാര്‍ തീരത്തുള്ളവര്‍ക്ക് ജാഗ്രതാനിര്‍ദേശം 

കുമളി: ജലനിരപ്പ് ക്രമാതീതമായി ഉയരുന്ന പശ്ചാത്തലത്തില്‍ മുല്ലപ്പെരിയാര്‍ ഡാമിലെ നാലു ഷട്ടറുകള്‍ കൂടി തുറന്നു. നിലവില്‍ അഞ്ചു ഷട്ടറുകള്‍ തുറന്നിട്ടുണ്ട്. ഇതോടെ തുറന്ന സ്പില്‍വേ ഷട്ടറുകളുടെ എണ്ണം ഒന്‍പതായി.

ജലനിരപ്പ് ഉയര്‍ന്ന സാഹചര്യത്തില്‍ വൈകീട്ടോടെയാണ് ഷട്ടറുകള്‍ ഘട്ടം ഘട്ടമായി തുറന്നത്. തുടക്കത്തില്‍ ഒരു ഷട്ടറാണ് തുറന്നിരുന്നത്. പിന്നീട് ഒരു ഷട്ടര്‍ കൂടി തുറന്ന് വെള്ളം പുറത്തേയ്ക്ക് ഒഴുക്കി. എന്നിട്ടും ജലനിരപ്പ് കുറയാതിരുന്നതിനെ തുടര്‍ന്ന് മൂന്ന് ഷട്ടറുകള്‍ കൂടി തുറന്നു. വൈകീട്ട്് ആറുമണിയോടെ നാലുഷട്ടറുകള്‍ കൂടി തുറക്കാന്‍ തീരുമാനിക്കുകയായിരുന്നു. 0.30 മീറ്റര്‍ അധികമായി ഉയര്‍ത്തി  7793.75 ഘനയടി വെള്ളമാണ് പുറത്തേയ്ക്ക് ഒഴുക്കുന്നത്. 

നിലവില്‍ 141.95 അടിയാണ് ഡാമിലെ ജലനിരപ്പ്. പെരിയാര്‍ നദിയുടെ ഇരുകരകളിലും താമസിക്കുന്നവര്‍ ജാഗ്രത പാലിക്കണമെന്ന് ജില്ലാ കളക്ടര്‍ അറിയിച്ചു.