നവജാതശിശുക്കളെ കുഴിച്ചുമൂടിയ പ്രതികൾ അറസ്റ്റിൽ; ആരാണ് പുതിയ പൊലീസ് മേധാവി; ഇന്നത്തെ 5 പ്രധാന വാർത്തകൾ

12 മണിക്കൂര്‍ നീണ്ട ചോദ്യംചെയ്യലിനൊടുവിൽ പുതുക്കാട് നവജാതശിശുക്കളെ കൊന്ന് കുഴിച്ചുമൂടിയ കേസിൽ പ്രതികളായ അവിവാഹിതരായ മാതാപിതാക്കളെ പൊലീസ് അറസ്റ്റ് ചെയ്തു. പുതിയ പൊലീസ് മേധാവിയെ സർക്കാർ ഇന്ന് തീരുമാനിക്കും. പ്ലസ് വണ്‍ പ്രവേശനത്തിന് ഇന്ന് വൈകീട്ട് അഞ്ചുവരെ അപേക്ഷിക്കാം. ഇന്നത്തെ 5 പ്രധാന വാർത്തകൾ ( Top 5 News Today ) അറിയാം

പുതുക്കാട് നവജാതശിശുക്കളെ കൊലപ്പെടുത്തി കുഴിച്ചുമൂടിയ സംഭവത്തില്‍ പ്രതികളായ അവിവാഹിതരായ മാതാപിതാക്കളുടെ അറസ്റ്റ് പൊലീസ് രേഖപ്പെടുത്തി. ആമ്പല്ലൂര്‍ ചേനക്കാല ഭവിന്‍ (25), വെള്ളിക്കുളങ്ങര നൂലുവള്ളി മുല്ലക്കപ്പറമ്പില്‍ അനീഷ (22) എന്നിവരെയാണ് അറസ്റ്റ് ചെയ്തത്. കുഞ്ഞുങ്ങളെ കുഴിച്ചിട്ട കുഴികൾ മാന്തിയുള്ള പരിശോധനയും ഇന്നു നടക്കും. 

സംസ്ഥാന പൊലീസ് മേധാവി ഷെയ്ഖ് ദർവേഷ് സാഹിബ് ഇന്ന് സർവീസിൽ നിന്നും വിരമിക്കും. പുതിയ പൊലീസ് മേധാവിയെ സംസ്ഥാന സർക്കാർ ഇന്നു തീരുമാനിക്കും. രാവിലെ ചേരുന്ന പ്രത്യേക മന്ത്രിസഭായോഗമാണ് പുതിയ ഡിജിപിയെ നിശ്ചയിക്കുക.

തിരുവനന്തപുരം മെഡിക്കല്‍ കോളജില്‍ ശസ്ത്രക്രിയ ഉപകരണങ്ങളുടെ അഭാവമുണ്ടെന്ന ഡോ. ഹാരിസ് ചിറയ്ക്കലിന്റെ വെളിപ്പെടുത്തലിൽ അന്വേഷണ സമിതിയെ നിയോഗിച്ച് ഉത്തരവിറങ്ങി. നാലം​ഗ സമിതിയാണ് സർക്കാർ രൂപീകരിച്ചിട്ടുള്ളത്.

ട്രെയിന്‍ പുറപ്പെടുന്നതിന് എട്ടു മണിക്കൂര്‍ മുന്‍പ് റിസര്‍വേഷന്‍ ചാര്‍ട്ട് തയാറാക്കാന്‍ തീരുമാനിച്ചതായി റെയില്‍വേ. വെയ്റ്റിങ് ലിസ്റ്റ് ടിക്കറ്റുള്ളവര്‍ നേരിടുന്ന ബുദ്ധിമുട്ട് കുറയ്ക്കാനാണ് മാറ്റം.

ക്ലബ് ലോകകപ്പിൽ ലയണൽ മെസിക്കും സംഘത്തിനും ദയനീയ തോൽവി. മെസിയുടെ ടീമായ ഇന്റർ മയാമിയെ യുവേഫ ചാമ്പ്യൻസ് ലീ​ഗ് ജേതാക്കളായ പിഎസ്ജി ഏകപക്ഷീയമായ നാലു​ഗോളുകൾക്കാണ് പരാജയപ്പെടുത്തിയത്. തോൽവിയോടെ മെസിയും സംഘവും ക്ലബ് ലോകകപ്പിൽ നിന്നും പുറത്തായി