മറവി പണിയായി, മോഷ്ടാക്കളെ ഭയന്നു സ്വർണവും പണവും കുഴിച്ചിട്ടു; പൊലീസെത്തി പുരയിടം ഉഴുതു കണ്ടെത്തി 

കൊല്ലം: മോഷ്ടാക്കളെ ഭയന്നു കുഴിച്ചിട്ട സ്വർണവും പണവും പുരയിടം ഉഴുതു കണ്ടെടുത്തു. ബന്ധുവീട്ടിൽ പോയപ്പോൾ പ്ലാസ്റ്റിക് കവറിൽ പൊതിഞ്ഞ് ആരുമറിയാതെ പുരയിടത്തിൽ കുഴിച്ചിട്ട 20 പവൻ സ്വർണവും 15,000 രൂപയുമാണ് പൊലീസെത്തി കണ്ടെടുത്തത്. മോഷണം പോയെന്ന പരാതിയെത്തുടർന്നാണ് പൊലീസെത്തി അന്വേഷണം നടത്തിയത്. 

ചങ്ങൻകുളങ്ങര സ്വദേശിനി ഭർത്താവിനൊപ്പം ബന്ധുവീട്ടിലേക്ക് പോയപ്പോഴാണ് സ്വർണവും പണവും കുഴിച്ചിട്ടത്. തിരികെയെത്തിയപ്പോൾ കുഴിച്ചിട്ട സ്ഥലം മറന്നു പോയി. ഇതേത്തുടർന്ന് സ്വർണം മോഷണം പോയെന്ന് പരാതി നൽകി. ഓച്ചിറ പൊലീസ് അന്വേഷണം നടത്തുന്നതിനിടയിലാണ് പുരയിടത്തിൽ കുഴിച്ചിട്ടതാണോയെന്നു സംശയമുണ്ടായത്. തുടർന്നാണ് പുരയിടത്തിൽ നിന്നു സ്വർണവും പണവും കണ്ടെത്തിയത്.