ആലപ്പുഴ: ചക്കുളത്തുകാവ് പൊങ്കാലയുടെ വരവറിയിച്ചു പ്രധാന ചടങ്ങായ കാര്ത്തിക സ്തംഭം ഡിസംബര് എട്ടിന് (ഞായറാഴ്ച) ഉയരും. ഡിസംബര് 13നാണ് പൊങ്കാല.
പുലര്ച്ചെ 4 ന് നിര്മ്മാല്യദര്ശനവും അഷ്ടദ്രവ്യ മഹാഗണപതി ഹോമവും 9 ന് വിളിച്ചു ചൊല്ലി പ്രാര്ഥനയും തുടര്ന്ന് ക്ഷേത്ര ശ്രീ കോവിലിലെ കെടാവിളക്കില് നിന്നും ട്രസ്റ്റ് പ്രസിഡന്റും മുഖ്യകാര്യദര്ശിയായ രാധാകൃഷ്ണന് നമ്പൂതിരി പകരുന്ന തിരിയില് നിന്ന് പണ്ടാര പൊങ്കാല അടുപ്പിലേക്ക് അഗ്നി പ്രോജോലിപ്പിച്ചുകൊണ്ട് പൊങ്കാലയ്ക്ക് തുടക്കം കുറിക്കും. ക്ഷേത്ര കാര്യദര്ശി മണിക്കുട്ടന് നമ്പൂതിരിയുടെ അദ്ധ്യക്ഷതയില് നടക്കുന്ന സംഗമത്തില് കേന്ദ്ര സഹമന്ത്രി സ്രുരേഷ് ഗോപിയും ഭാര്യ രാധിക സുരേഷ് ഗോപിയും പൊങ്കാലയുടെ ഉദ്ഘാടനം നിര്വഹിക്കും. RC ചാരിറ്റബിള് ട്രസ്റ്റ് ചെയര്മാനും പ്രമുഖ സാമൂഹിക പ്രവര്ത്തകനുമായ റെജി ചെറിയാന് മുഖ്യാതിഥിയായിരിക്കും. ക്ഷേത്ര മേല്ശാന്തി അശോകന് നമ്പൂതിരിയുടെ കാര്മ്മികത്വത്തില് ട്രസ്റ്റിമാരായ രഞ്ജിത്ത് ബി നമ്പൂതിരി, ദുര്ഗ്ഗാദത്തന് നമ്പൂതിരി എന്നിവരുടെ ആഭിമുഖ്യത്തില് പൊങ്കാല സമര്പ്പണ ചടങ്ങുകള് നടക്കും.
11 ന് 500ലധികം വേദ പണ്ഡിതന്മാരുടെ മുഖ്യ കാര്മ്മികത്വത്തില് ദേവിയെ 51 ജീവതകളിലായി എഴുന്നള്ളിച്ച് ഭക്തര് തയ്യാറാക്കിയ പൊങ്കാല നേദിക്കും. പൊങ്കാല നേദ്യത്തിനു ശേഷം ദിവ്യാ അഭിഷേകവും ഉച്ചദീപാരാധനയും നടക്കും.
വൈകിട്ട് 5 ന് നടക്കുന്ന സാംസ്കാരിക സമ്മേളനത്തിന് ക്ഷേത്ര കാര്യദര്ശി മണിക്കുട്ടന് നമ്പൂതിരി ഭദ്രദീപം തെളിയിക്കും. ക്ഷേത്ര മുഖ്യകാര്യദര്ശി രാധാകൃഷണന് നമ്പൂതിരി അനുഗ്രഹപ്രഭാഷണം നടത്തും. കുട്ടനാട് എംഎല്എ തോമസ്സ് കെ തോമസ്സിന്റെ അദ്ധ്യക്ഷതയില് സംസ്ഥാന ഗതാഗത വകുപ്പു മന്ത്രി കെ ബി ഗണേഷ്കുമാര് സാംസ്കാരിക സമ്മേളനം ഉദ്ഘാടനം ചെയ്യും. മാവേലിക്കര എം പി കൊടിക്കുന്നില് സുരേഷ് മുഖ്യാതിഥിയായിരിക്കും. ക്ഷേത്ര മേല്ശാന്തി അശോകന് നമ്പൂതിരി മംഗളാരതി സമര്പ്പിക്കുകയും പശ്ചിമ ബംഗാള് ഗവര്ണ്ണര് ഡോ.സിവി ആനന്ദബോസ് ഐഎഎസ് കാര്ത്തിക സ്തംഭത്തില് അഗ്നി പ്രോജ്വലിപ്പിക്കുന്ന ചടങ്ങുകളും നിര്വഹിക്കും.
തലവടി ഗ്രാമപഞ്ചായത്ത് പ്രസിഡന്റ് ഗായത്രി ബി നായര്, തിരുവല്ല മുന്സിപ്പല് ചെയര് പേഴ്സണ് അനു ജോര്ജജ്, മുട്ടാര് ഗ്രാമപഞ്ചായത്ത് പ്രസിഡന്റ് സുരമ്യ കെ, ചമ്പക്കുളം ബ്ലോക്ക് പഞ്ചായത്ത് അംഗം അജിത്ത് കുമാര് പിഷാരത്ത്, തലവടി ഗ്രാമപഞ്ചായത്ത് വാര്ഡ് മെമ്പറുമായ കൊച്ചുമോള് ഉത്തമന്, ABASS അഖിലേന്ത്യാ പ്രസിഡന്റ് അഡ്വ. ഡി. വിജയകുമാര്, മാന്നാര് അബുദുള് ലത്തീഫ്, ഉത്സവകമ്മറ്റി പ്രസിഡന്റ് എംപി രാജീവ്, സെക്രട്ടറി സ്വാമിനാഥന് എന്നിവര് പങ്കെടുക്കും.
വിവിധ ഇന്ഫര്മേഷന് സെന്ററുകളില് 1500-ത്തിലധികം ക്ഷേത്ര വോളന്റിയേഴ്സ് നിര്ദ്ദേശങ്ങളുമായി സേവന പ്രവര്ത്തനങ്ങള് നടത്തും. ഭക്തരുടെ പ്രാഥമികാവശ്യങ്ങള്ക്കായി സ്ഥിരം സംവിധാനങ്ങള്ക്കു പുറമെ താത്കാലിക ശൗചാലയങ്ങളും ഏര്പ്പെടുത്തും. പൊലീസ്, കെഎസ്ആര്ടിസി, ആരോഗ്യ-തദ്ദേശ സ്വയംഭരണ സ്ഥാപനങ്ങള്, ഫയര്ഫോഴ്സ്, കെഎസ്ഇബി, ജല അതോറിറ്റി, എക്സൈസ്, ജല ഗതാഗതം, റവന്യു വകുപ്പുകളുടെ സേവനം ആലപ്പുഴ-പത്തനംതിട്ട ജില്ലാ കലക്ടര്മാരുടെ നേതൃത്വത്തില് സജ്ജീകരിക്കും. പാര്ക്കിംഗിനും പ്രത്യേക സൗകര്യം ഏര്പ്പെടുത്തും. പ്ലാസ്റ്റിക്ക് പൂര്ണ്ണമായി നിരോധിച്ചും ഹരിത ചട്ടങ്ങള് പാലിച്ചുമാണ് പൊങ്കാലയുടെ ക്രമീകരണങ്ങള് നടത്തിയിരിക്കുന്നത്.
ക്ഷേത്ര മാനേജിങ് ട്രസ്റ്റി & ചീഫ് അഡ്മിനിസ്ട്രേറ്റര് മണിക്കുട്ടന് നമ്പൂതിരി, രഞ്ചിത്ത് ബി നമ്പൂതിരി, മീഡിയ കോഡിനേറ്റര് അജിത്ത് കുമാര് പിഷാരത്ത്, ഉത്സവകമ്മറ്റി പ്രസിഡന്റ് എംപി രാജീവ്, സെക്രട്ടറി സ്വാമിനാഥന് എന്നിവര് പത്രസമ്മേളനത്തില് പങ്കെടുത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
