'ഞാൻ നിർത്താം, ഡ്രമ്മിന്റെ മുട്ടൽ കഴിയട്ടെ'; പ്രസം​ഗത്തിനിടെ ചെണ്ടമേളം, അതൃപ്തി പ്രകടിപ്പിച്ച് മുഖ്യമന്ത്രി

തിരുവനന്തപുരം; മുഖ്യമന്ത്രി പിണറായി വിജയൻ വേദിയിൽ സംസാരിക്കുന്നതിനിടെ പുറത്ത് ചെണ്ടമേളം. മെഡിസെപ് ഇൻഷുറൻസ് പദ്ധതിയുടെ ഉദ്ഘാടന പ്രസംഗത്തിനിടെയായിരുന്നു സംഭവം. തുടർന്ന് പ്രസം​ഗം നിർത്തിയ മുഖ്യമന്ത്രി നീരസം പ്രകടിപ്പിച്ചു. 

മുഖ്യമന്ത്രി പ്രസം​ഗിക്കുന്നതിനിടയിൽ വേദിക്കു പുറത്തുണ്ടായിരുന്ന മേളക്കാർ ചെണ്ടമേളം നടത്തുകയായിരുന്നു. ചെണ്ടമേളം തുടർന്നതോടെയാണ് മുഖ്യമന്ത്രി നീരസം വ്യക്തമാക്കി. ഡ്രമ്മിന്റെ മുട്ടൽ കഴിയുന്നതുവരെ താൻ കുറച്ചു നേരം നിർത്താം എന്നു പറഞ്ഞുകൊണ്ടാണ് മുഖ്യമന്ത്രി പ്രസം​ഗം പാതിവഴിയിൽ അവസാനിപ്പിച്ചത്. 

‘ഇപ്പോൾ ഇവിടെയുള്ളവർ എന്റെ സംസാരമല്ല കേൾക്കുന്നത്. ആ ഡ്രമ്മിന്റെ മുട്ടലാണെന്നതു കൊണ്ട് കുറച്ചു നേരം ഞാൻ നിർത്താം. അത് കഴിയട്ടെ, എന്നിട്ട് സംസാരിക്കാം. ഇപ്പോൾ ഈ കാണിച്ചതിനെപ്പറ്റി ഞാൻ പറയുന്നില്ല എന്നു മാത്രം’– എന്നാണ് മുഖ്യമന്ത്രി പറഞ്ഞത്. മുഖ്യമന്ത്രി പ്രസംഗം നിർത്തിയതിന് പിന്നാലെ പൊലീസ് ഉദ്യോഗസ്ഥർ ഇടപെട്ട് ചെണ്ടമേളം നിർത്തിച്ചു. ചെണ്ടമേളം നിന്നതിനു ശേഷമാണു മുഖ്യമന്ത്രി പ്രസംഗം തുടർന്നത്.

ഈ വാർത്ത കൂടി വായിക്കാം 

ശക്തമായ മഴ തുടരും; 13 ജില്ലകളിൽ യെല്ലോ അലർട്ട്,  രൂക്ഷമായ കടലാക്രമണത്തിന് സാധ്യത

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ