തുണി വാങ്ങിയാൽ പെട്രോൾ ഫ്രീ! ​ഗംഭീര ഓഫറുമായി വസ്ത്രസ്ഥാപനം; കേരളത്തിലെ എല്ലാ ഷോറൂമിലും ഓഫർ 

തിരുവനന്തപുരം: ക്രിസ്മസ് പ്രമാണിച്ച് ഷോപ്പിങ്ങിനിറങ്ങുന്നവരെ കടയിലെത്തിക്കാൻ ​ഗംഭീര ഓഫറുമായി വസ്ത്രസ്ഥാപനം. കടയിലെത്തി വസ്ത്രം വാങ്ങുന്നവർക്ക് പെട്രോള്‍ സൗജന്യമായി ലഭിക്കുമെന്നാണ് വാ​ഗ്ദാനം. ആയിരം രൂപയ്ക്ക് വസ്ത്രം വാങ്ങിച്ചാൽ ഒരു ലിറ്റർ പെട്രോൾ സൗജന്യമായി ലഭിക്കും. ഓരോ ആയിരം രൂപയുടെ പർച്ചേസിനും ഓരോ ലിറ്റർ പെട്രോൾ വച്ച് ലഭിക്കുന്ന നിലയിലാണ് ഓഫർ ക്രമീകരിച്ചിരിക്കുന്നത്. 

എം സി ആറിന്റെ വിവിധ ഷോറൂമുകളിലാണ് ഓഫർ ലഭിക്കുക. കേരളത്തിലുള്ള എം സി ആറിന്റെ എല്ലാ ഷോറൂമുകളിലും ഓഫർ ലഭ്യമാണെന്ന് കമ്പനി പ്രതിനിധികൾ പറഞ്ഞു. ഷോറൂമിനടുത്തുള്ള പെട്രോൾ പമ്പുകളുമായി സഹകരിച്ചാണ് ഓഫർ നൽകുന്നത്.

ഡിസംബർ ആറ് മുതൽ ജനുവരി അഞ്ച് വരെയുള്ള ഒരു മാസത്തേക്കാണ് ഓഫർ കാലാവധി. ഓരോ ആയിരം രൂപക്കും ഒരു ലിറ്റർ പെട്രോളിന്റെ ഓരോ കൂപ്പൺ വച്ച് ലഭിക്കും. ആയിരം രൂപക്ക് വസ്ത്രം വാങ്ങിച്ചാൽ ഒരു കൂപ്പണും, അയ്യായിരം രൂപക്ക് അഞ്ച് കൂപ്പണും, പതിനായിരം രൂപയ്ക്ക് പത്ത് കൂപ്പണും ഉപഭോക്താവിന് ലഭിക്കും. പമ്പിലെത്തി ഈ കൂപ്പൺ കാണിച്ചാൽ പെട്രോളടിക്കാം.