വിവാദങ്ങൾ അവസാനിപ്പിക്കണം; മത സൗഹാർദവും സമുദായ സാഹോദര്യവും സംരക്ഷിക്കപ്പെടണം; കർദിനാൾ 

കൊച്ചി: പാലാ ബിഷപ്പിന്റെ പ്രസ്താവനയെ തുടർന്നുണ്ടായ വിവാദങ്ങൾ അവസാനിപ്പിക്കണമെന്ന് കെസിബിസി അധ്യക്ഷനും സിറോ മലബാർ സഭ മേജർ ആർച്ച് ബിഷപ്പുമായ കർദിനാൾ മാർ ജോർജ് ആലഞ്ചേരി. മത സൗഹാർദവും സമുദായ സാഹോദര്യവും സംരക്ഷിക്കപ്പെടണമെന്നും അദ്ദേഹം വ്യക്തമാക്കി. 

സാഹോദര്യം നിലനിർത്താനായി മതാചാര്യൻമാരും രാഷ്ട്രീയ, സമുദായ നേതാക്കളും നടത്തുന്ന ശ്രമങ്ങളോട് സഹകരിക്കണം. സമൂഹത്തിൽ ഉത്തരവാദപ്പെട്ട സ്ഥാനങ്ങളിലിരിക്കുന്നവർ നടത്തുന്ന പ്രസ്താവനകളെയും പ്രവർത്തനങ്ങളെയും ദുർവ്യാഖ്യാനിക്കുന്നതിനെതിരെ ജാഗ്രത പാലിക്കണമെന്നും അദ്ദേഹം പറഞ്ഞു. 

യഥാർഥ ലക്ഷ്യത്തിൽ നിന്ന് മാറ്റി നിർത്തിയുള്ള വ്യാഖ്യാനം തെറ്റിദ്ധാരണകൾക്കും ഭിന്നതയ്ക്കും ഇടയാക്കും. കർദിനാൾ‌ വ്യക്തമാക്കി.