തിരുവനന്തപുരം: വിഴിഞ്ഞം തുറമുഖത്തിന്റെ കമ്മീഷനിങ്ങിനുശേഷം നടക്കുന്ന പൊതുസമ്മേളനത്തില്‍ പ്രതിപക്ഷ അംഗങ്ങളെ ഒഴിവാക്കിയതില്‍ പ്രധാനമന്ത്രിയെയും മുഖ്യമന്ത്രിയെയും പരിഹസിച്ച് കോണ്‍ഗ്രസ് നേതാവ് കെ മുരളീധരന്‍. ഈനാംപേച്ചിക്ക് മരപ്പട്ടി എന്ന പോലെയാണ് ഇരുവരും. മോദിക്ക് യോഗി ആദിത്യനാഥ് പോലം ഇത്രയ്ക്ക് മാച്ചാകില്ലെന്നും മുരളീധരന്‍ പറഞ്ഞു. എതിര്‍ ശബ്ദം ഇരുവരും ആഗ്രഹിക്കുന്നില്ലെന്നും മുരളീധരന്‍ മാധ്യമങ്ങളോട് പറഞ്ഞു.
'ഞാന്‍ വീണ്ടും അധികാരത്തില്‍ എത്തിയില്ലെങ്കില്‍ പരശുരാമന്‍ വീണ്ടും വന്ന് മഴു എറിയണമെന്ന് പിണറായിക്ക് പ്രസംഗിക്കാം. പ്രധാനമന്ത്രിക്ക് ഞാന്‍ ഇല്ലെങ്കില്‍ ഇന്ത്യാ ഭൂഖണ്ഡം തന്നെ അപ്രത്യക്ഷമാകുമെന്ന് പ്രസംഗിക്കാം. ഇങ്ങനെയുള്ള രണ്ട് ജല്‍പനങ്ങള്‍ മാത്രമാണ് ഇന്ന് നടക്കാന്‍ സാധ്യതയുള്ളത്. എതിര്‍ ശബ്ദങ്ങളെ ഇല്ലാതാക്കുന്ന കാര്യത്തില്‍ നരേന്ദ്രമോദിയും പിണറായി വിജയനും ഒരേ തൂവല്‍പ്പക്ഷികളാണ്. ഈനാംപേച്ചിക്ക് കൂട്ട് മരപ്പട്ടി എന്നപറയുന്നതുപോലെ. പ്രധാനമന്ത്രിക്ക് പറ്റിയ മുഖ്യമന്ത്രി. ഇത്രയ്ക്ക് കോമ്പിനേഷന്‍ ബിജെപിക്ക് പോലും ഒരു സംസ്ഥാനത്തും കിട്ടില്ല. യോഗി ആദിത്യനാഥ് പോലും മോദിക്ക് ഇത്ര മാച്ചാവില്ല. ഇവിടെ നല്ല മാച്ചാണ്. ഇതുകൊണ്ടൊന്നും ഇതിന്റെ ക്രഡിറ്റ് ഈ രണ്ടുപേര്‍ക്കും കിട്ടില്ല. അടുത്ത തെരഞ്ഞെടുപ്പില്‍ ഇതിന്റെ പ്രതികരണം ഉണ്ടാകും'- മുരളീധരന്‍ പറഞ്ഞു.
'അടുത്ത തെരഞ്ഞെടുപ്പില്‍ പിവി അന്‍വര്‍ യുഡിഎഫിന്റെ കൂടെ ഉണ്ടാകും. നിലമ്പൂര്‍ തെരഞ്ഞെടുപ്പിലും തദ്ദേശ തെരഞ്ഞെടുപ്പിലും നിയമസഭാ തെരഞ്ഞെടുപ്പിലും അന്‍വര്‍ യുഡിഎഫിന്റെ ഭാഗമായിരിക്കും. നിലമ്പൂര്‍ തെരഞ്ഞടുപ്പ് നടക്കുമോയെന്ന് അറിയില്ല. രണ്ടുപേരും നടത്താതിരിക്കാനാണ് ശ്രമിക്കുന്നത്. ഒരാഴ്ചയ്ക്കുള്ളില്‍ പ്രഖ്യാപനം വന്നില്ലെങ്കില്‍ ഉപതെരഞ്ഞെടുപ്പിന് സാധ്യതയില്ലെന്നാണ് അര്‍ഥം. കേന്ദ്രത്തിനാണെങ്കില്‍ ബിജെപിക്ക് ഒട്ടും വോട്ടില്ലാത്ത സ്ഥലമാണ്. മറിച്ചുകൊടുത്താല്‍ പോലും അവര്‍ക്ക് രക്ഷയില്ല. സിപിഎം 25,000 വോട്ടിന് തോറ്റാല്‍ ഇപ്പോള്‍ പാദസേവ ചെയ്യുന്ന ഉദ്യോഗസ്ഥര്‍ പോലും മൈന്‍ഡ് ചെയ്യാത്ത അവസ്ഥയുണ്ടാകും. ഇലക്ഷന്‍ വേണ്ടെന്നാണ് രണ്ടൂകൂട്ടരുടെയും താത്പര്യം'- മുരളീധരന്‍ പറഞ്ഞു.
കശ്മീരില്‍ വീണ്ടും ടൂറിസ്റ്റുകള്‍ വന്നുതുടങ്ങി. ഇന്ത്യ ഇപ്പോഴും യുദ്ധം യുദ്ധം എന്നുപറയുകയാണ്. യുദ്ധം ഉണ്ടായാല്‍ ഇന്ത്യ ഒറ്റക്കെട്ടായി നില്‍ക്കും. 26 സഹോദരങ്ങളെ കൊന്ന ഒരു തീവ്രവാദിയെ പോലും പിടിക്കാനോ വധിക്കാനോ ഈ സര്‍ക്കാരിന് കഴിഞ്ഞിട്ടില്ലെന്നും മുരളീധരന്‍ പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
