കൊച്ചി: കളമശ്ശേരി ബസ് കത്തിക്കല് കേസിലെ പ്രതി കെ എ അനൂപിന് ആറ് വര്ഷം കഠിന തടവും, 1.6ലക്ഷം രൂപ പിഴയും. കൊച്ചിയിലെ എന്ഐഎ പ്രത്യേക കോടതിയാണ് ശിക്ഷ വിധിച്ചത്. ഒളിവിലായിരുന്ന വടക്കന് പറവൂര് സ്വദേശിയായ അനൂപിനെ 2016 ഏപ്രിലിലാണ് എന്ഐഎ അറസ്റ്റ് ചെയ്യ്തത്.
അനൂപ് ഒഴികെയുള്ള പ്രതികള് പല കേസുകളിലായി തടവില് തുടരുന്നതിനാല് വിചാരണ പൂര്ത്തിയായിട്ടില്ല. കെ എ അനൂപിന്റെ വിചാരണ പൂര്ത്തിയായ ഘട്ടത്തിലാണ് ഇയാളുടെ ശിക്ഷ കോടതി പറഞ്ഞത്. തടിയന്റവിട നസീര്, സൂഫിയ മദനി ഉള്പ്പടെ കേസില് 13 പ്രതികളുണ്ട്. ഇവരുടെ വിചാരണ തുടരുകയാണെന്ന് എന്ഐഎ അറിയിച്ചു. 2010ല് കേസില് കുറ്റപത്രം സമര്പ്പിച്ചെങ്കിലും കേസിന്റെ വിചാരണ 2019 ല് മാത്രമാണ് തുടങ്ങിയത്.
2005 സപ്റ്റംബര് 9 നാണ് കേസിനാസ്പദമായ സംഭവം. എറണാകുളം കെഎസ്ആര്ടിസി ബസ്റ്റാന്ഡില്നിന്ന് സേലത്തേക്ക് പോകുന്ന തമിഴ്നാട് ട്രാന്സ്പോര്ട്ട് ബസ് ആണ് രാത്രി 9.30ന് പ്രതികള് തോക്കുചൂണ്ടി ഭീഷണിപ്പെടുത്തി തട്ടിയെടുത്തത്. യാത്രക്കാരെ ഇറക്കിവിട്ട ശേഷം ബസ് പെട്രോളൊഴിച്ച് തീ കൊളുത്തുകയായിരുന്നു. കോയമ്പത്തൂര് സ്ഫോടനകേസില് ജയിലില് കഴിയുന്ന പിഡിപി നേതാവ് അബ്ദുള്നാസര് മദനിയെ ജയിലില്നിന്നും മോചിപ്പിക്കണമെന്നാവശ്യപ്പെട്ടായിരുന്നു അക്രമം.
നിരവധി തീവ്രവാദ കേസുകളില് പ്രതിയായ തടിയന്റവിട നസീറാണ് കേസിലെ ഒന്നാം പ്രതി. ബസ് തട്ടിയെടുക്കാന് നസീര് ഉപയോഗിച്ച തോക്ക് ഇതുവരെ കണ്ടെടുക്കാന് അന്വേഷണസംഘത്തിനായിട്ടില്ല. പിന്നീട് കാശ്മീരില് സൈന്യവുമായുള്ള ഏറ്റുമുട്ടലില് വെടിയേറ്റുമരിച്ച പരപ്പനങ്ങാടി ചെട്ടിപ്പടി സ്വദേശി അബ്ദുല് റഹീമിനെയും കുറ്റപത്രത്തില്നിന്നും ഒഴിവാക്കിയിട്ടുണ്ട്.
മദനിയുടെ ഭാര്യ സൂഫിയ കേസില് പത്താം പ്രതിയാണ്. ബസ് ഡ്രൈവറുടെയടക്കം എട്ടു പേരുടെ മൊഴി കുറ്റപത്രത്തിനൊപ്പം ചേര്ത്ത് 2010 ഡിസംബറിലാണ് എന്ഐഎ കുറ്റപത്രം സമര്പ്പിച്ചത്. ബസ് യാത്രക്കാരായ 31 പേരുടെ മൊഴി പൊലീസ് നേരത്തെ വിശദമായി രേഖപ്പെടുത്തിയിരുന്നെങ്കിലും ഫയലുകള് പിന്നീട് കാണാതായി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
