പൂത്തുലഞ്ഞ് കൊന്നകള്‍, വിഷുവിന് കണികാണാന്‍ കിട്ടുമോ?

തൃശൂര്‍: സംസ്ഥാനത്ത് കാലം തെറ്റി പൂത്തുലഞ്ഞ് കണിക്കൊന്നകള്‍. മീനമാസം പകുതിയോടെ മാത്രം പൂവിടാറുള കണിക്കൊന്നകള്‍ ഇത്തവണ നേരത്തെ പൂവിട്ടു. മാര്‍ച്ച് ആദ്യവാരത്തോടെ തന്നെ സംസ്ഥാനത്താകമാനം കണിക്കൊന്നകള്‍ പൂത്തുലഞ്ഞ് ദൃശ്യ വിരുന്നൊരുക്കി നില്‍ക്കുമ്പോള്‍ ഒരു മാസം ബാക്കി നില്‍ക്കെ വിഷുവിന് കണി വയ്ക്കാന്‍ പൂക്കളുണ്ടാകുമോ എന്നാണ് ആശങ്ക.

കാലാവസ്ഥയിലെ മാറ്റങ്ങളും മണ്ണിലെ ഈര്‍പ്പത്തിലെ വ്യതിയാനവുമാണ് കൊന്നകള്‍ നേരത്തെ പൂവിടാന്‍ കാരണമെന്നാണ് കരുതുന്നത്. കഴിഞ്ഞ കുറേവര്‍ഷമായി ഫെബ്രുവരി, മാര്‍ച്ച് മാസങ്ങളില്‍ താപനില ഗണ്യമായി ഉയരുന്നുണ്ട്. 32 ഡിഗ്രിയില്‍ താപനില എത്തുമ്പോഴാണ് സാധാരണയായി കൊന്നകള്‍ പൂക്കാറുള്ളത്. അന്തരീക്ഷത്തിലെ അമിതമായ ചൂട് സസ്യങ്ങളിലെ ഹോര്‍മോണുകളെ ഉത്തേജിപ്പിക്കുകയും പൂവിടാന്‍ പ്രേരിപ്പിക്കുകയും ചെയ്യുന്നതായി സസ്യശാസ്ത്രകാരന്മാര്‍ പറയുന്നു.

കാലാവസ്ഥാ വ്യതിയാനം കാരണം സസ്യങ്ങള്‍ക്ക് ലഭിക്കുന്ന പ്രകാശത്തിന്റെ തീവ്രതയിലും കാലയളവിലും മാറ്റം വന്നു. ഇത് ചെടികളുടെ ബയോളജിക്കല്‍ ക്ലോക്ക് തെറ്റാന്‍ കാരണമാകുന്നു. മണ്ണിലെ ജലാംശം വല്ലാതെ കുറയുമ്പോള്‍ സസ്യങ്ങള്‍ ഒരുക്കുന്ന അതിജീവന തന്ത്രമാണ് കൊന്നകളും ചെയ്യുന്നതെന്നാണ് സസ്യശാസ്ത്രകാരന്മാരുടെ അഭിപ്രായം. ആഗോള താപനം കേരളത്തിന്റെ കാലാവസ്ഥയിലും പിടിമുറുക്കിയതായി പരിസ്ഥിതിവാദികള്‍ ചൂണ്ടിക്കാട്ടുന്നു. കാലം തെറ്റി കണിക്കൊന്നകള്‍ പൂക്കുന്നത് അതിന്റ സൂചനയാണ്.