കെആർ നാരായണൻ ഫിലിം ഇൻസ്റ്റിറ്റ്യൂട്ട്: ഷിബു അബ്രഹാമിന് ഡയറക്ടറുടെ താല്ക്കാലിക ചുമതല

തിരുവനന്തപുരം: കെ ആർ നാരായണൻ ഫിലിം ഇൻസ്റ്റിറ്റ്യൂട്ട് ഡയറക്ടറുടെ താല്ക്കാലിക ചുമതല ഷിബു അബ്രഹാമിന്. ഡയറക്ടർ ശങ്കർ മോഹൻ രാജിവെച്ച ഒഴിവിലേക്കാണ് ഫിനാൻസ് ഓഫീസർ ഷിബു അബ്രഹാമിന് താൽക്കാലിക ചുമതല നൽകിയിരിക്കുന്നത്. ഇൻസ്റ്റിറ്റ്യൂട്ടിന്റെ ദൈനംദിന, ഭരണപരമായ കാര്യങ്ങൾ നിർവ്വഹിക്കാനാണ് താല്ക്കാലിക ചുമതലയെന്ന് ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആർ ബിന്ദു അറിയിച്ചു. 

ജാതിവിവേചനം ഉൾപ്പെടെ നിരവധി ആരോപണങ്ങൾ നേരിട്ട ശങ്കർ മോഹൻ ശനിയാഴ്ചയാണ് രാജിവച്ചത്. സർക്കാർ നിയോഗിച്ച രണ്ടാമത്തെ സമിതിയും സമരം ചെയ്ത വിദ്യാർഥികളുടെ പരാതി ശരിവച്ചുള്ള റിപ്പോർട്ട് നൽകിയെന്ന് മനസ്സിലാക്കിയതിന് പിന്നാലെയായിരുന്നു രാജി. അതേസമയം തന്റെ രാജിക്ക് വിവാദങ്ങളുമായി ബന്ധമില്ലെന്നാണ് ശങ്കർ മോഹൻ പറഞ്ഞത്. കാലാവധി തീർന്നതിനാലാണ് രാജിയെന്നാണ് അറിയിച്ചത്. അതേസമയം ഡയറക്ടർ ശങ്കർ മോഹൻ രാജിവച്ചതിന് പിന്നാലെ ഡീൻ ചന്ദ്രമോഹൻ ഉൾപ്പെടെ എട്ടുപേർ രാജിവച്ചു. അധ്യാപകർക്ക് ഗുണനിലവാരമില്ലെന്ന പരാതി അംഗീകരിക്കാനാവില്ലെന്ന് പറഞ്ഞായിരുന്നു ഇവരുടെ രാജി. 

ഈ വാര്‍ത്ത കൂടി വായിക്കൂ ബിബിസി ഡോക്യുമെന്ററി പ്രദര്‍ശനം; തടയാന്‍ ബിജെപി, തലസ്ഥാനത്ത് സംഘര്‍ഷം

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ