കണ്ണന്റെ മുന്നിൽ ചിത്രയുടെ സ്വര മാധുര്യം; ഭക്തിയിൽ ആറാടി ​ഗുരുപവനപുരി

തൃശൂർ: ഗുരുവായൂർ ഉത്സവം നാലാം ദിനത്തിൽ ഗുരുവായൂരപ്പന് മുന്നിൽ ഭക്തിഗാന മാധുര്യവുമായി കെഎസ് ചിത്ര. ഭക്തി നിറവിൽ ഗാന സമർപ്പണം ഹൃദയത്തിലേറ്റുവാങ്ങി ഭക്തസഹസ്രങ്ങൾ. കൂടെ പാടിയും മനസിൽ മൂളിയും അവർ ഭക്ത്യാനന്ദ നിർവൃതി നേടി.

ഗണപതി സ്തുതിയോടെ തുടങ്ങിയ ഗാന സന്ധ്യയിൽ കെഎസ് ചിത്ര കൂടുതലും പാടിയത് കൃഷ്ണ ഭക്തിഗാനങ്ങളാണ്. പ്രശസ്ത സംഗീത സംവിധായകൻ ടിഎസ് രാധാകൃഷ്ണൻ്റെ നേതൃത്വത്തിലുള്ള സംഘമാണ് ഓർക്കസ്ട്ര ഒരുക്കിയത്.

ഭക്തിഗാനമേള സമർപ്പണത്തിനെത്തിയ ചിത്രയെ ദേവസ്വം ആദരിച്ചു. ചെയർമാൻ ഡോ. വികെ വിജയൻ നിലവിളക്ക് ഉപഹാരമായി സമ്മാനിച്ചു. ദേവസ്വം ഭരണസമിതി അംഗം കെപി വിശ്വനാഥൻ പൊന്നാടയണിയിച്ചു. ഭരണ സമിതി അംഗം സി മനോജ്, അഡ്മിനിസ്ട്രേറ്റർ ഒബി അരുൺകുമാർ, അസി. മാനേജർ കെജി സുരേഷ് കുമാർ, പിആർഒ വിമൽ ജി നാഥ് സന്നിഹിതരായി.