മൻസൂർ വധക്കേസ് പ്രതിയുടെ വീടിന് തീയിട്ടു; കാറും സ്‌കൂട്ടറും കത്തിനശിച്ചു 

കണ്ണൂർ: പാനൂർ മൻസൂർ വധക്കേസിലെ പ്രതിയുടെ വീടിന് തീയിട്ടു. മുസ്ലിം ലീഗ് പ്രവർത്തകൻ മൻസൂറിനെ കൊലപ്പെടുത്തിയ കേസിലെ പ്രതിപട്ടികയിലെ പത്താം പ്രതിയായ പി പി ജാബിറിന്റെ വീടിനാണ് തീയിട്ടത്. ഇന്ന് പുലർച്ചെ ഒന്നരയോടെയാണ് സംഭവം. 

വീടിന്റെ ഒരു ഭാ​ഗം കത്തി നശിച്ചു. പോർച്ചിൽ നിർത്തിയിട്ടിരുന്ന നാനോ കാറും സ്‌കൂട്ടറും കത്തി. പൊലീസും ഫയർഫോഴ്‌സും എത്തിയാണ് തീയണച്ചത്. സിപിഎം വള്ളുവകണ്ടി ബ്രാഞ്ച് സെക്രട്ടറിയും ലോക്കൽ കമ്മിറ്റി അംഗവുമാണ് പി പി ജാബിർ. 

വോട്ടെടുപ്പ് ദിനം രാത്രിയിൽ ബോംബെറിഞ്ഞ് ഭീകരാന്തരീക്ഷം സൃഷ്ടിച്ച ശേഷം വീട്ടിൽ അതിക്രമിച്ച് കയറിയാണ് ലീ​ഗ് പ്രവർത്തകനായ മൻസൂറിനെയും സഹോദരൻ മുഹസിനെയും വെട്ടിയത്. ബോംബ് സ്‌ഫോടനത്തെ തുടർന്ന് ഇടത് കാൽമുട്ടിന് താഴെയുണ്ടായ മുറിവാണ് മരണകാരണം എന്നാണ് പോസ്റ്റുമോർട്ടം റിപ്പോർട്ട്.