'അതൊരു നിലവിളിയാണ്; ശബ്ദരഹിതമായ ആ നിലവിളി അനേകരുടെ ശബ്ദത്തിലൂടെ പ്രതിധ്വനിക്കട്ടെ'

കൊച്ചി: ബലാത്സംഗ കേസില്‍ രാഹുല്‍ മാങ്കൂട്ടത്തിലിനെ അറസ്റ്റ് ചെയ്തതിന് പിന്നാലെ അതിജീവിത ഫെയ്‌സ്ബുക്കില്‍ പങ്കുവെച്ച കുറിപ്പിനോട് പ്രതികരിച്ച് മന്ത്രി വീണാ ജോര്‍ജ്. നിസ്സഹായമായ , ശബ്ദരഹിതമായ ആ നിലവിളി അനേകരുടെ ശബ്ദത്തിലൂടെ പ്രതിധ്വനിക്കട്ടെയെന്ന് വീണാ ജോര്‍ജ് ഫെയ്‌സ്ബുക്കില്‍ കുറിച്ചു. 'ഇനി നമ്മള്‍ കാണും വരെ നിങ്ങളെ ഞങ്ങള്‍ ഞങ്ങളുടെ ഹൃദയത്തില്‍ പേറും'- എന്ന് പറഞ്ഞുകൊണ്ടാണ് മന്ത്രി തന്റെ കുറിപ്പ് അവസാനിപ്പിക്കുന്നത്.

കുറിപ്പ്:

ഒരു മണിക്കൂര്‍ മുന്‍പ് പോസ്റ്റ് ചെയ്യപ്പെട്ട ഒരു കുറിപ്പ് വായിച്ചു .

അതൊരു നിലവിളിയാണ് .

നിസ്സഹായമായ ,ശബ്ദരഹിതമായ ആ നിലവിളി അനേകരുടെ ശബ്ദത്തിലൂടെ പ്രതിധ്വനിക്കട്ടെ.

'സ്വര്‍ഗത്തില്‍ നിന്ന് മാലാഖകുഞ്ഞുങ്ങള്‍ ഞങ്ങള്‍ക്ക് മാപ്പ് നല്‍കട്ടെ .

അവരുടെ ആത്മാക്കള്‍ സമാധാനമായിരിക്കട്ടെ.

ആക്രമണങ്ങളില്‍ നിന്നും ഭീതിയില്‍ നിന്നും സ്വതന്ത്രരായി ;

സംരക്ഷിക്കാന്‍ കഴിയാതെ പോയ ലോകത്തില്‍ നിന്നും സ്വതന്ത്രരായി ;

ഞങ്ങളുടെ കണ്ണീര്‍ സ്വര്‍ഗത്തില്‍ എത്തുമെങ്കില്‍ ,പ്രിയപ്പെട്ട കുഞ്ഞുങ്ങളെ , അവ നിങ്ങളോടു പറയട്ടെ .....

ഇനി നമ്മള്‍ കാണും വരെ നിങ്ങളെ ഞങ്ങള്‍ ഞങ്ങളുടെ ഹൃദയത്തില്‍ പേറും.'

ഹൃദയഭേദകം!