നെതർലൻഡ്സും ഇംഗ്ലണ്ടും സെമിയിൽ, ജമ്മുവിൽ 4 ഭീകരരെ വധിച്ചു... ഇന്നത്തെ 5 പ്രധാന വാർത്തകൾ

വരും മണിക്കൂറിൽ തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർക്കോട് ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ നേരിയ മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ വീശിയേക്കാവുന്ന ശക്തമായ കാറ്റിനും സാധ്യതയുണ്ട്.

ജമ്മു കശ്മീരിലെ കുൽ​ഗാമിലുണ്ടായ ഏറ്റുമുട്ടലിൽ നാല് ഭീകരരെ സുരക്ഷാ സേന വധിച്ചു. ഏറ്റുമുട്ടലിൽ രണ്ട് ജവാൻമാർക്ക് വീരമൃത്യു. പ്രദേശത്ത് സൈന്യം തിരിച്ചടി തുടരുകയാണ്. നാല് ഭീകരർക്കായി തിരച്ചിലും തുടരുന്നു. ഏറ്റുമുട്ടലിൽ മറ്റൊരു സൈനികനു പരിക്കേറ്റു. സൈനികനെ ആശുപത്രിയിലേക്ക് മാറ്റി.

പെനാൽറ്റി ഷൂട്ടൗട്ടിലേക്ക് നീണ്ട പോരിൽ സ്വിറ്റ്സർലൻഡിനെ വീഴ്ത്തി ഇം​ഗ്ലണ്ട് യൂറോ കപ്പ് സെമിയിൽ. നിശ്ചിത സമയത്തും അധിക സമയത്തും മത്സരം 1-1നു സമനിലയിൽ അവസാനിച്ചപ്പോൾ വിധി നിർണയിച്ചത് പെനാൽറ്റി. അഞ്ചിൽ അഞ്ച് കിക്കുകളും ഇം​ഗ്ലണ്ട് താരങ്ങൾ ലക്ഷ്യത്തിലെത്തിച്ചപ്പോൾ സ്വിസ് താരം മാനുവൽ അകാഞ്ചിയുടെ ഷോട്ട് തടുത്ത് ​ഗോൾ കീപ്പർ ജോർദാൻ പിക്ഫോഡ് ഹീറോ ആയി.

വൻ അട്ടിമറി ഭീഷണി ഉയർത്തിയ തുർക്കിയെ ​ഗംഭീര തിരിച്ചു വരവു നടത്തി കീഴടക്കി നെതർലൻഡ്സ് യൂറോ കപ്പ് സെമിയിൽ. ഒരു ​ഗോളിനു പിന്നിൽ നിന്ന ശേഷം രണ്ട് ​ഗോളുകൾ മടക്കി 2-1നാണ് ഓറഞ്ച് പട വിജയം പിടിച്ച് അവസാന നാലിൽ സീറ്റുറപ്പിച്ചത്.

സംസ്ഥാനത്ത് ഇന്നും മഴ തുടരും. ഏഴ് ജില്ലകളിൽ യെല്ലോ അലർട്ട്. ആലപ്പുഴ, എറണാകുളം, തൃശൂർ, മലപ്പുറം, കോഴിക്കോട്, കണ്ണൂർ, കാസർക്കോട് ജില്ലകളിലാണ് യെല്ലോ മുന്നറിയിപ്പ്.

ഓട്ടിസം ബാധിതനായ വിദ്യാര്‍ഥിയെ സര്‍ക്കാര്‍ സ്‌കൂളില്‍ നിന്ന് പുറത്താക്കിയതായി പരാതി. തൈക്കാട് മോഡല്‍ എല്‍പി സ്‌കൂളിലെ പ്രിന്‍സിപ്പലാണ് വിദ്യാര്‍ഥിയെ നിര്‍ബന്ധിച്ച് പുറത്താക്കിയത്. കുട്ടി സ്‌കൂളില്‍ തുടരുന്നത് സ്‌കൂളിന്റെ നിലനില്‍പ്പിനെ തന്നെ ബാധിക്കും എന്നായിരുന്നു പ്രിസിന്‍സിപ്പലിന്റെ വിചിത്ര വാദം.