നിയമസഭാ തെരഞ്ഞെടുപ്പില് ചരിത്രവിജയം നേടിയ ശേഷം തിരുവനന്തപുരത്ത് നിന്ന് കൊച്ചിയിലെത്തിയ പ്രതിപക്ഷ നേതാവ് വിഡി സതീശന് കോണ്ഗ്രസ് പ്രവര്ത്തകരുടെ ഉജ്ജ്വല സ്വീകരണം. നൂറ് കണക്കിന് പ്രവര്ത്തകരാണ് എറണാകുളം സൗത്ത് റെയില്വേ സ്റ്റേഷനിലെത്തിയ വിഡി സതീശനെ വരവേറ്റത്. 'മുഖ്യമന്ത്രി സതീശാ' എന്നായിരുന്നു പ്രവര്ത്തകര് ആവേശത്തോടെ മുദ്രാവാക്യം വിളിച്ചത്..നിയമസഭ തെരഞ്ഞെടുപ്പില് എല്ഡിഎഫ് കനത്ത പരാജയം ഏറ്റുവാങ്ങിയ ശേഷം ഇതുവരെ മാധ്യമങ്ങളെ കാണാതെ കാവല് മുഖ്യമന്ത്രി പിണറായി വിജയന്. മട്ടന്നൂരിലും കണ്ണൂര് വിമാനത്താവളത്തില് നിന്ന് തിരുവനന്തപുരത്ത് എത്തിയ ശേഷവും പിണറായി വിജയന് മാധ്യമങ്ങളോട് പ്രതികരിച്ചില്ല. ചോദ്യങ്ങളുമായി മാധ്യമപ്രവര്ത്തകര് പിണറായി വിജയന്റെ അരികിലേക്ക് എത്തിയെങ്കിലും ചെറു പുഞ്ചിരിയോടെ കൈവീശി അഭിവാദ്യം അര്പ്പിച്ചതല്ലാതെ ഒന്നും പ്രതികരിക്കാന് അദ്ദേഹം തയ്യാറായില്ല..രാജിവെക്കില്ലെന്ന് പ്രഖ്യാപിച്ച് പശ്ചിമ ബംഗാള് മുഖ്യമന്ത്രി മമത ബാനര്ജി. തെരഞ്ഞെടുപ്പില് പരാജയപ്പെട്ടിട്ടില്ലെന്നും, ബിജെപി ജനവിധി കൊള്ളയടിക്കുകയായിരുന്നുവെന്നും മമത ആരോപിച്ചു. 'ഞാന് പരാജയപ്പെട്ടിട്ടില്ല, അതിനാല് രാജ്ഭവനില് പോകില്ല. ഞാന് രാജിവയ്ക്കില്ല'. മമത ബാനര്ജി മാധ്യമങ്ങളോട് പറഞ്ഞു..തമിഴ്നാട് മുഖ്യമന്ത്രിയായി ടിവികെ നേതാവ് വിജയ് മെയ് ഏഴിന് സത്യപ്രതിജ്ഞ ചെയ്യുമെന്ന് റിപ്പോര്ട്ടുകള്. ഇക്കാര്യത്തില് അന്തിമ തീരുമാനം ഉടന് ഉണ്ടാകുമെന്നും ടിവികെ അധ്യക്ഷന് വിജയ് പറഞ്ഞു. സത്യപ്രതിജ്ഞയ്ക്ക് അനുമതി തേടി വിജയ് ഗവര്ണര്ക്ക് കത്തയച്ചു. തമിഴ്നാട്ടില് കോണ്ഗ്രസിന്റെ പിന്തുണ തേടി വിജയ് എഐസിസി ജനറല് സെക്രട്ടറി കെസി വേണുഗോപാലിന് കത്ത് നല്കി. ഡിഎംകെ ഇതരപാര്ട്ടികളുടെ പിന്തുണ തേടുന്നതും പാര്ട്ടി ആലോചിക്കുന്നു. ഇക്കാര്യത്തില് ഉടന് തീരുമാനം ഉണ്ടാകുമെന്നാണ് പുറത്തുവരുന്ന റിപ്പോര്ട്ടുകള്..മുഖ്യമന്ത്രി സ്ഥാനത്തേക്ക് അവകാശവാദവുമായി മുതിര്ന്ന നേതാവ് രമേശ് ചെന്നിത്തല. പാര്ട്ടിയിലെ സീനിയര് നേതാവാണ് താന്. സീനിയോറിറ്റി മാനദണ്ഡം ആണോ എന്ന് തീരുമാനിക്കേണ്ടത് പാര്ട്ടിയാണ്. മോശമല്ലാത്ത എംഎല്എമാരുടെ പിന്തുണ കിട്ടും. പാര്ട്ടി നീതിപൂര്വമായ തീരുമാനം എടുക്കുമെന്നും രമേശ് ചെന്നിത്തല പറഞ്ഞു..Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
