ഡൽഹിയിൽ അരങ്ങേറുന്നത് നാസി ജർമ്മനിയെ ഓർമ്മിപ്പിക്കുന്ന നരനായാട്ട്; ചോരയിൽ മുക്കിക്കൊല്ലാൻ നോക്കേണ്ടെന്ന് പിണറായി വിജയൻ

തിരുവനന്തപുരം: തെരഞ്ഞെടുപ്പ് പ്രക്രിയയെയും ഭരണഘടനാ സ്ഥാപനങ്ങളെയും കൈപ്പിടിയിലൊതുക്കാനുള്ള ഏകാധിപത്യ നീക്കങ്ങൾക്കെതിരെ രാജ്യതലസ്ഥാനത്ത് ഉയർന്ന പ്രക്ഷോഭത്തെ നരേന്ദ്ര മോദി സർക്കാർ ചോരയിൽ മുക്കിക്കൊല്ലാൻ ശ്രമിക്കുകയാണെന്ന് പ്രതിപക്ഷ നേതാവ് പിണറായി വിജയൻ. സമാധാനപരമായി സംഘടിച്ചവർക്കെതിരെ കിരാതമായ ഭരണകൂട ഭീകരതയാണ് അരങ്ങേറിയതെന്നും ഹിറ്റ്ലറുടെ നാസി ജർമ്മനിയെ ഓർമ്മിപ്പിക്കുന്ന നരനായാട്ടാണ് ഡൽഹിയിൽ നടന്നതെന്നും അദ്ദേഹം ഫേസ്ബുക്ക് കുറിപ്പിൽ കുറ്റപ്പെടുത്തി.

പ്രതിഷേധങ്ങളെ അടിച്ചമർത്താൻ അരലക്ഷത്തോളം പൊലീസിനെയും അർധസൈനികരെയുമാണ് തെരുവിൽ വിന്യസിച്ചത്. സിപിഐഎം രാജ്യസഭാ കക്ഷി നേതാവ് ജോൺ ബ്രിട്ടാസ് എംപിയെ പൊലീസ് വാഹനത്തിലിട്ട് ശ്വാസംമുട്ടിച്ച് മർദ്ദിക്കുകയും തെരുവിൽ വലിച്ചെറിയുകയും ചെയ്തു. ഒരു പാർലമെന്റ് അംഗത്തിന് പോലും സുരക്ഷ നൽകാത്ത ഡൽഹി പൊലീസ് വെറും ക്രിമിനൽ സംഘമായി അധഃപതിച്ചിരിക്കുകയാണെന്ന് പിണറായി വിജയൻ കുറ്റപ്പെടുത്തി.

വിദ്യാർത്ഥി-യുവജന നേതാക്കൾക്ക് നേരെ സമാനതകളില്ലാത്ത ക്രൂരതയാണ് അഴിച്ചുവിട്ടത്. എസ്എഫ്ഐ അഖിലേന്ത്യാ പ്രസിഡന്റ് ആദർശ് എം. സജിയുടെ മുഖത്തടിച്ച് ഗുരുതരമായി പരിക്കേൽപ്പിച്ചു. ഡിവൈഎഫ്ഐ കേന്ദ്രകമ്മിറ്റി അംഗം ജെയ്ക്ക് സി. തോമസിനെ നടുറോഡിലൂടെ വലിച്ചിഴയ്ക്കുകയും വിവസ്ത്രനാക്കുകയും ചെയ്തു. എസ്എഫ്ഐ വനിതാ നേതാക്കളായ സിമ്രൻ, ശരണ്യ എന്നിവരുടെ കഴുത്തിന് കുത്തിപ്പിടിക്കുകയും വസ്ത്രങ്ങൾ വലിച്ചുകീറുകയും ചെയ്ത പൊലീസ്, കസ്റ്റഡിയിലെടുത്ത വിദ്യാർത്ഥികളെ വാഹനങ്ങൾക്കകത്തിട്ട് ചവിട്ടിമെതിക്കുകയായിരുന്നു. ധ്രുവ് റാഠി, അഭിജീത് ദിപ്കെ തുടങ്ങി പ്രക്ഷോഭത്തിന്റെ നേതൃനിരയിലുണ്ടായിരുന്ന നിരവധി പേർ ക്രൂരമായ അതിക്രമത്തിനിരയായി.

ആയിരക്കണക്കിന് പേരെയാണ് പൊലീസ് മൃഗീയമായി തല്ലിച്ചതച്ചത്. അറസ്റ്റിലായവരെ പാർപ്പിക്കാൻ സ്റ്റേഡിയങ്ങളെ താൽക്കാലിക തടങ്കൽ പാളയങ്ങളാക്കി മാറ്റിയിരിക്കുകയാണ്. നേതാക്കളെ ഇരുമ്പഴികൾ കൊണ്ട് മറച്ച ബസുകളിൽ കയറ്റി അതിർത്തികളിലേക്ക് നാടുകടത്താനാണ് നോക്കുന്നത്. ചോദ്യങ്ങൾ ചോദിക്കുന്നവരെയും വിയോജിക്കുന്നവരെയും ഭയപ്പെടുത്തി നിശ്ശബ്ദരാക്കാമെന്നത് സംഘപരിവാറിന്റെ അതിമോഹം മാത്രമാണെന്നും, അധികാരത്തിന്റെ ഹുങ്കിൽ നടത്തുന്ന ഈ ഭീകരതയ്ക്ക് മുന്നിൽ ഇടതുപക്ഷ പ്രസ്ഥാനങ്ങൾ മുട്ടുമടക്കില്ലെന്നും അദ്ദേഹം മുന്നറിയിപ്പ് നൽകി. തെരുവുകളിൽ വീണ ഓരോ തുള്ളി ചോരയ്ക്കും ബിജെപി സർക്കാർ ജനങ്ങളോട് മറുപടി പറയേണ്ടിവരുമെന്നും ഈ അടിച്ചമർത്തലിനെതിരെ രാജ്യത്തെ മുഴുവൻ ജനാധിപത്യ വിശ്വാസികളും ഒറ്റക്കെട്ടായി ശബ്ദമുയർത്തണമെന്നും പിണറായി വിജയൻ ആഹ്വാനം ചെയ്തു.