കൊണ്ടോട്ടിയില്‍ പ്രസവത്തിന് പിന്നാലെ യുവതി മരിച്ച സംഭവം: അന്വേഷണം ആരംഭിച്ചു

മലപ്പുറം: കൊണ്ടോട്ടിയിലെ സ്വകാര്യ ആശുപത്രിയില്‍ പ്രസവത്തിന് പിന്നാലെ 24കാരി മരിച്ച സംഭവത്തില്‍ ആരോഗ്യ വകുപ്പ് അന്വേഷണം ആരംഭിച്ചു. പ്രസവത്തിനിടെ ആശുപത്രി അധികൃതരുടെ ഭാഗത്തുനിന്നുണ്ടായ വീഴ്ചയാണ് മരണകാരണമെന്ന് ബന്ധുക്കള്‍ ആരോപിച്ചതിനെ തുടര്‍ന്നാണ് അന്വേഷണം. മഞ്ചേരി മറിയാട് സ്വദേശി പി മുഹമ്മദ് വസീമിന്റെ ഭാര്യ റീം സിത്താര (24) ആണ് ശനിയാഴ്ച രാവിലെ കോഴിക്കോട് സ്വകാര്യ ആശുപത്രിയില്‍ മരിച്ചത്. കൊണ്ടോട്ടി സ്വദേശികളായ ജാബിര്‍ പള്ളത്തിലും ഷരീന മന്നാറിലുമാണ് മാതാപിതാക്കള്‍.

വെള്ളിയാഴ്ച കൊണ്ടോട്ടിയിലെ സ്വകാര്യ ആശുപത്രിയില്‍ റീം സിത്താര ആണ്‍കുഞ്ഞിന് ജന്മം നല്‍കി. പ്രസവത്തിന് പിന്നാലെ അമിത രക്തസ്രാവമുണ്ടായതിനെ തുടര്‍ന്ന് ആരോഗ്യനില ഗുരുതരമായെന്നും വിദഗ്ധ ചികിത്സയ്ക്കായി കോഴിക്കോട്ടേക്ക് മാറ്റാന്‍ നിര്‍ദേശിച്ചെന്നുമാണ് ആശുപത്രി അധികൃതര്‍ അറിയിച്ചത്. തുടര്‍ന്ന് കോഴിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ച യുവതിക്ക് രക്തം നല്‍കിയെങ്കിലും ആരോഗ്യനില വഷളായി ശനിയാഴ്ച രാവിലെ മരിച്ചു. നവജാത ശിശു മഞ്ചേരി ഗവ മെഡിക്കല്‍ കോളജ് ആശുപത്രിയില്‍ ചികിത്സയിലാണ്.

പ്രസവത്തിനിടെ ആശുപത്രി അധികൃതരുടെ ഭാഗത്തുനിന്നുണ്ടായ അനാസ്ഥയാണ് മരണത്തിന് കാരണമായതെന്ന് ബന്ധുക്കള്‍ ആരോപിച്ചു. സംഭവത്തില്‍ ഇതുവരെ പരാതി ലഭിച്ചിട്ടില്ലെന്നും അന്വേഷണം നടത്തുമെന്നും മലപ്പുറം ജില്ലാ മെഡിക്കല്‍ ഓഫിസര്‍ വിനോദ് പറഞ്ഞു. കൊണ്ടോട്ടിയിലെ ആശുപത്രിയില്‍ ചികിത്സയിലിരിക്കെ തന്നെ യുവതിയുടെ നില ഗുരുതരമായിരുന്നെന്നാണ് ലഭിച്ച വിവരം. കോഴിക്കോട്ടെ സ്വകാര്യ ആശുപത്രിയിലെത്തിച്ച് പ്രാഥമിക ചികിത്സ ആരംഭിച്ചതിന് പിന്നാലെയാണ് മരണമെന്നും അദ്ദേഹം പറഞ്ഞു.