പൂച്ചയെ കെട്ടുന്ന ചങ്ങല കഴുത്തിലിട്ട് കളിക്കുന്നതിനിടെ കാല്‍ വഴുതി വീണു; പത്തുവയസുകാരന് ദാരുണാന്ത്യം

വളാഞ്ചേരി: വളർത്തു പൂച്ചയെ കെട്ടിയിടുന്ന ചങ്ങല കഴുത്തിൽ കുടുങ്ങി പത്തുവയസ്സുകാരൻ മരിച്ചു. കാടാമ്പുഴ കുട്ടാടുമ്മലാണ് സംഭവം. ഉമറുൽ ഫാറൂഖിന്റെയും ഖമറുന്നീസയുടെയും മകൻ അഫ്‌നാസാണ് മരിച്ചത്.

വീടിന്റെ അടുക്കള ഭാഗത്ത് വാതിലിനോട് ചേർന്ന് രണ്ട് ഇഴകളായി തൂക്കിയിട്ട ചങ്ങലയിൽ കഴുത്തിട്ട് പടികൾക്ക് മുകളിൽ കയറിനിന്ന്  കളിക്കുകയായിരുന്നു. ഇതിനിടെ കാൽതെറ്റി വീഴുകയും കഴുത്തിൽ ചങ്ങല കുടുങ്ങുകയും ചെയ്തു. 

വീട്ടിൽ ആളുകളുണ്ടായിരുന്നെങ്കിലും കുട്ടിയുടെ ശബ്ദം പുറത്തുവരാതിരുന്നതിനാൽ ആരും ശ്രദ്ധിച്ചില്ല. കുറച്ചു സമയത്തിനു ശേഷം ഉമ്മയാണ് കുട്ടി ചങ്ങലയിൽ തൂങ്ങി നിൽക്കുന്നതു കണ്ടത്. ബന്ധുക്കളും അയൽക്കാരും ചേർന്ന് കാടാമ്പുഴയിലെ സ്വകാര്യ ആശുപത്രിയിലെത്തിച്ചങ്കിലും മരിച്ചിരുന്നു.