ലീഗ് ഉന്നതാധികാര സമിതി യോഗം ഇന്ന് ; വിവാദങ്ങൾ ചർച്ചയാകും

മലപ്പുറം : മുസ്ലീം ലീഗ് ഉന്നതാധികാര സമിതി യോഗം ഇന്ന് മലപ്പുറത്ത് ചേരും. പാർട്ടി സംസ്ഥാന പ്രസിഡന്റ് പാണക്കാട് ഹൈദരലി ശിഹാബ് തങ്ങളുടെ വസതിയിലാണ് യോ​ഗം. തദ്ദേശഭരണ തെരഞ്ഞെടുപ്പിന്‍റെ ഒരുക്കങ്ങൾ വിലയിരുത്താനാണ് യോഗം.

സംസ്ഥാന പ്രസിഡണ്ട് പാണക്കാട് ഹൈദരലി ശിഹാബ് തങ്ങൾ, പി.കെ.കുഞ്ഞാലിക്കുട്ടി, എം.പി, പാണക്കാട് സാദിഖലി ശിഹാബ് തങ്ങൾ, കെപിഎ മജീദ് എന്നിവർ നേരിട്ടും ബാക്കി നേതാക്കൾ ഓൺലൈനായും യോഗത്തിൽ പങ്കെടുക്കും. ഫാഷൻ ​ഗോൾഡ് തട്ടിപ്പുമായി ബന്ധപ്പെട്ട് എം സി കമറുദ്ദീൻ എംഎൽഎയുടെ അറസ്റ്റ് യോ​ഗത്തിൽ ചർച്ചയാകും. 

പ്ലസ് ടു കോഴ, അനധികൃത സ്വത്ത് സമ്പാദനക്കേസുകളിൽ  കെ എം ഷാജിക്കെതിരെയുള്ള അന്വേഷണം, സിപിഎം സംസ്ഥാന സെക്രട്ടറി സ്ഥാനത്തു നിന്നുള്ള കോടിയേരി ബാലകൃഷന്‍റെ മാറ്റം തുടങ്ങിയ കാര്യങ്ങളും യോഗം ചർച്ച ചെയ്തേക്കും.