തിരുവനന്തപുരം: സംസ്ഥാനത്ത് ചൂട് കനക്കുന്നതിനാല് ജാഗ്രത നിര്ദേശവുമായി അധികൃതര്. ചൂട് കൂടുന്നതിന് അനുസരിച്ച് യു വി സൂചികയും വര്ധിക്കുന്നുണ്ട്. തുടര്ച്ചയായി കൂടുതല് സമയം അള്ട്രാവയലറ്റ് രശ്മികള് ശരീരത്തില് ഏല്ക്കുന്നത് സൂര്യാതപത്തിനും ത്വക്ക് രോഗങ്ങള്ക്കും നേത്രരോഗങ്ങള്ക്കും മറ്റ് ആരോഗ്യ പ്രശ്നങ്ങള്ക്കും കാരണമായേക്കാം. പൊതുജനങ്ങള് സുരക്ഷാമുന്കരുതലുകള് സ്വീകരിക്കണമെന്നാണ് മുന്നറിയിപ്പ്.
യു വി ഇന്ഡെക്സ് ഏറ്റവും കൂടുതല് രേഖപ്പെടുത്തിയത് ഇടുക്കിയിലാണ്. 7 ആണ് ഇടുക്കിയില് രേഖപ്പെടുത്തിയിരിക്കുന്നത്. ഇത് സംസ്ഥാനത്ത് ഏറ്റവും കൂടിയ യു വി സൂചികയാണ്. അതേസമയം പത്തനംതിട്ട, ആലപ്പുഴ, കോട്ടയം, വയനാട് ജില്ലകളില് യു വി ഇന്ഡെക്സ് ആറാണ്.
6-7 വരെയുള്ള യു വി ഇന്ഡെക്സ് മഞ്ഞ മുന്നറിയിപ്പില് ഉള്പ്പെടുന്നതിനാല് ജനങ്ങള് മുന്കരുതല് സ്വീകരിക്കണമെന്നാണ് നിര്ദേശം. കൂടുതല് നേരം ശരീരത്തില് നേരിട്ട് സൂര്യപ്രകാശം ഏല്ക്കുന്നത് ഒഴിവാക്കണമെന്നതാണ് പ്രധാന നിര്ദേശം. പകല് 10 മുതല് മൂന്നു മണിവരെയാണ് ഉയര്ന്ന യു വി സൂചിക രേഖപ്പെടുത്തുന്നത്. അതിനാല് പുറം ജോലികളില് ഏര്പ്പെടുന്നവര്, കടലിലും ഉള്നാടന് മത്സ്യബന്ധനത്തിനും പോകുന്നവര്, ജലഗതാഗതത്തിലേര്പ്പെടുന്നവര്, ബൈക്ക് യാത്രികര്, വിനോദസഞ്ചാരികള്, കാന്സര് രോഗികള്, ചര്മ- നേത്ര രോഗങ്ങളുള്ളവരെല്ലാം പ്രത്യേകം ജാഗ്രത പാലിക്കണമെന്നാണ് നിര്ദേശം.
പകല്സമയത്ത് പുറത്തിറങ്ങുന്നവര് തൊപ്പി, കുട, സണ്ഗ്ലാസ് എന്നിവ ഉപയോഗിക്കുക, ശരീരം മുഴുവന് മറയുന്ന പരുത്തി വസ്ത്രങ്ങള് ഉപയോഗിക്കുക എന്നീ നിര്ദേശങ്ങളും പുറത്തിറക്കിയിട്ടുണ്ട്. മലമ്പ്രദേശങ്ങളിലും ഉഷ്ണമേഖലാ പ്രദേശങ്ങളിലും യു വി സൂചിക ഉയര്ന്ന നിലയിലായിരിക്കും
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
