വട്ടപ്പാറ വയഡക്ടില്‍ നിന്നും യുവാവ് വീണുമരിച്ചു, പ്രണയ തകര്‍ച്ചയെ തുടര്‍ന്നുള്ള ആത്മഹത്യയെന്ന് പൊലീസ്

മലപ്പുറം: ദേശീയപാത 66-ല്‍ വളാഞ്ചേരിയിലെ വട്ടപ്പാറ വയഡക്ട് പാലത്തില്‍ നിന്നും യുവാവ് വീണു മരിച്ചനിലയില്‍. കടുങ്ങാത്തുകുണ്ട് ഇരിങ്ങാവൂര്‍ കുറുപ്പുംപടി നെല്ലിക്കാട്ടില്‍ വീട്ടില്‍ സ്വരാജ് (23) ആണ് മരിച്ചത്. വെള്ളിയാഴ്ച രാത്രി പത്തോടെയാണു സംഭവം.

വയഡക്ടിലെ ഏറ്റവും ഉയര്‍ന്ന പോയിന്റായ പത്താംനമ്പര്‍ പില്ലറിനു മുകളില്‍ നിന്നാണ് സ്വരാജ് താഴേക്ക് പതിച്ചത്. യുവാവിന്റെത് ആത്മഹത്യയാണെന്നാണ് വിലയിരുത്തല്‍. പ്രണയബന്ധം തകര്‍ന്നതില്‍ മനംനൊന്താണ് യുവാന് ജീവനൊടുക്കിയത് എന്നാണ് പൊലീസ് നിഗമനം. വളാഞ്ചേരി പോലീസും നാട്ടുകാരും സ്ഥലത്തെത്തി. മൃതദേഹം വളാഞ്ചേരിയിലെ സ്വകാര്യ ആശുപത്രിയിലെ മോര്‍ച്ചറിയിലേക്കു മാറ്റി.