അധ്യാപികമാര്‍ക്കെതിരായ പരാമര്‍ശം; പൊലീസ് കേസെടുത്തു, ഫോര്‍വേഡ് ചെയ്തവരും കുടുങ്ങും

തിരുവനന്തപുരം: വിക്ടേഴ്‌സ് ചാനലിലെ അധ്യാപികമാര്‍ക്കെതിരെ സാമൂഹ്യമാധ്യമങ്ങളില്‍ അപകീര്‍ത്തിപരമായ പരാമര്‍ശം നടത്തിയതില്‍ പൊലീസ് കേസെടുത്തു. കൈഫ്റ്റ് സിഇഒ അന്‍വര്‍ സാദത്ത്  നല്‍കിയ പരാതിയുടെ അടിസ്ഥാനത്തിലാണ് നടപടി.

ഫെയ്‌സ്ബുക്ക്, യു ട്യൂബ്, ഇന്‍സ്റ്റഗ്രാം, വാട്‌സ് ആപ്പ് എന്നിവയിലൂടെ അധ്യാപികമാരെ അപമാനിച്ചെന്ന് ചൂണ്ടിക്കാട്ടിയാണ് സിഇഒ എഡിജിപി മനോജ് എബ്രഹാമിന് പരാതി നല്‍കിയത്. സൈബര്‍ പൊലീസിന്റെ പ്രത്യേക സംഘം കേസ് അന്വേഷിക്കും. പരാമര്‍ശം നടത്തിയവരും ഇതു പ്രചരിപ്പിച്ചവരും സൈബര്‍ നിയമപ്രകാരം കുറ്റവാളികളാണെന്ന് പൊലീസ് പറഞ്ഞു.
 
അധ്യാപകരെ സാമൂഹ്യ മാധ്യമങ്ങളിലൂടെ അപമാനിച്ചവര്‍ക്കെതിരെ യുവജനകമ്മിഷന്‍ സ്വമേധയാ കേസ് എടുത്തിട്ടുണ്ട്.