ഇനി ഇടവഴികളിലൂടെയും അഗ്നിശമനസേനയുടെ വാഹനങ്ങള്‍ സഞ്ചരിക്കും

കേരളത്തിലെ അഗ്‌നിരക്ഷാ സേന ഇനി ചെറു ഇടവഴികളിലൂടെയും സഞ്ചരിക്കും. 30 പുതിയ ഫയര്‍ എഞ്ചിനുകള്‍ സേനയുടെ ഭാഗമായിക്കഴിഞ്ഞു. തീരെ വലിപ്പം കുറഞ്ഞ ഈ വാഹനങ്ങള്‍ കൂടുതല്‍ പ്രയോജനപ്രദമാണ്. തീപിടുത്തമുണ്ടായാല്‍ കെട്ടിടത്തിന്റെ അടുത്തെത്താന്‍ കഴിയും.

തീപിടുത്തമുണ്ടായാല്‍ വലിയ വാഹനങ്ങളായതിനാല്‍ വളരെയകലെ നിര്‍ത്തിയതിനുശേഷം അവിടെ നിന്ന് ഹോസ്‌പൈപ്പുകളുപയോഗിച്ച് തീപിടുത്തമുണ്ടായ സ്ഥലത്തേക്ക് വെള്ളം എത്തിക്കുന്നതായിരുന്നു ഇതുവരെ ചെയ്തിരുന്നത്. പുതിയ ഫയര്‍ എഞ്ചിനുകള്‍ ഇടുങ്ങിയ വഴിയിലൂടെയും സഞ്ചരിക്കും. മാത്രമല്ല മോശം റോഡുകളിലൂടെയും ഈ വാഹനങ്ങള്‍ അനായാസം കടന്ന് ചെല്ലും.

500 ലിറ്റര്‍ വെള്ളമാണ് ഈ വാഹനത്തില്‍ നിറയ്ക്കാനാവുക. ഇത് കുറഞ്ഞ അളവാണെങ്കിലും വെള്ളം ചീറ്റിക്കുന്നതിനുപകരം മികച്ച സാങ്കേതിക വിദ്യ ഉപയോഗിച്ച് മഞ്ഞുപെയ്യുന്നതുപോലെ വ്യാപ്തിയില്‍ വെള്ളമെത്തിക്കാന്‍ കഴിയുന്നതുമൂലം തീപിടുത്തം കാര്യക്ഷമമായി നിയന്ത്രിക്കാന്‍ സാധിക്കും. ഡ്രൈവറുള്‍പ്പെടെ 5 പേര്‍ക്ക് ഈ ഫയര്‍ എഞ്ചിനില്‍ സഞ്ചരിക്കാം.