ഇന്ത്യ ഞങ്ങളെ അനു​ഗ്രഹിക്കണം; പാക്കിസ്ഥാനെതിരെ കനത്ത 'ട്രോൾ ആക്രമണം'

പുൽവാമ ഭീകരാക്രമണത്തിന് കനത്ത തിരിച്ചടി നൽകിയ ഇന്ത്യൻ സേനയുടെ ആക്രമണം ആഘോഷിച്ച് ട്രോളൻമാരും. ബാലാക്കോട്ടിലെ ജെയ്ഷെ മുഹമ്മദ് ക്യാമ്പ് ആക്രമിച്ച് ഭീകരരെ വധിച്ച ഇന്ത്യൻ വ്യോമസേന തിരിച്ചടിച്ചതാണ് ട്രോളൻമാർ ആഘോഷമാക്കിയത്. രാവിലെ മുതൽ ട്രോൾ പേജുകളിൽ ട്രോളുകളുടെ പൂരമാണ്. ഭീകരരും പാക്കിസ്ഥാനും പാക് സൈന്യവും പ്രധാനമന്ത്രി ഇമ്രാൻ ഖാനും എല്ലാം ട്രോളുകളിൽ നിറഞ്ഞു കവിയുകയാണ്. 

ബാലാകോട്ടിലുള്ള ജയ്ഷെ മുഹമ്മദിന്‍റെ ഏറ്റവും വലിയ പരിശീലന കേന്ദ്രം ആക്രമിച്ച് തകർത്തതായി ഇന്ത്യ വ്യക്തമാക്കി. ജയ്ഷെ മുഹമ്മദ് തലവൻ മസൂദ് അസറിന്‍റെ ഭാര്യാ സഹോദരനും ജയ്ഷെ കമാൻഡറുമായ യൂസുഫ് അസർ ആക്രമണത്തിൽ കൊല്ലപ്പെട്ടു.  പരിശീലന കേന്ദ്രത്തിലുണ്ടായിരുന്ന നിരവധി ജയ്ഷെ നേതാക്കളെയും വധിച്ചതായി ഇന്ത്യ വ്യക്തമാക്കി. ഇന്ന് പുലർച്ചെയായിരുന്നു ഇന്ത്യയുടെ തിരിച്ചടി.