ഇന്ന് തിരുവനന്തപുരത്ത് മാത്രം 226 കോവിഡ് ബാധിതര്‍, മൂന്ന് ജില്ലകളില്‍ നൂറിലധികം കേസുകള്‍; ആശങ്കയില്‍ കേരളം, കണക്കുകള്‍ ഇങ്ങനെ

തിരുവനന്തപുരം: സംസ്ഥാനത്ത് ഇന്ന് 1038 പേര്‍ക്ക് കോവിഡ് ബാധ കണ്ടെത്തിയപ്പോള്‍ കൂടുതല്‍ രോഗികള്‍ തിരുവനന്തപുരം ജില്ലയിലാണ്. തിരുവനന്തപുരത്ത് 226 പേര്‍ക്കാണ് വൈറസ് ബാധ സ്ഥിരീകരിച്ചത്. കൊല്ലം, ആലപ്പുഴ, കാസര്‍കോട് ജില്ലകളില്‍ വൈറസ് ബാധ സ്ഥിരീകരിച്ചവരുടെ എണ്ണം നൂറിലധികമാണ്. കൊല്ലത്ത് 133 പേര്‍ക്കും ആലപ്പുഴയില്‍ 120 പേര്‍ക്കുമാണ് ഇന്ന് കോവിഡ് ബാധ കണ്ടെത്തിയത്. കാസര്‍കോട് ഇന്ന് കോവിഡ് സ്ഥിരീകരിച്ചത് 101 പേര്‍ക്കാണ്.

എറണാകുളം 93, മലപ്പുറം 61, തൃശ്ശൂര്‍ 56, കോട്ടയം 51, പത്തനംതിട്ട 49, ഇടുക്കി 43, കണ്ണൂര്‍ 43, പാലക്കാട് 34, കോഴിക്കോട് 25, വയനാട് 4 എന്നിങ്ങനെയാണ് മറ്റ് ജില്ലകളില്‍ കോവിഡ് സ്ഥിരീകരിച്ചവരുടെ കണക്ക്.

ഇന്ന് കോവിഡ് സ്ഥിരീകരിച്ചവരില്‍ 785 പേര്‍ക്ക് സമ്പര്‍ക്കത്തിലൂടെയാണ് വൈറസ് ബാധയുണ്ടായത്. ഇതില്‍ 57 പേരുടെ ഉറവിടം വ്യക്തമല്ല. മറ്റ് രാജ്യങ്ങളില്‍ നിന്നെത്തിയ 87 പേര്‍ക്കും മറ്റ് സംസ്ഥാനങ്ങളില്‍ നിന്നെത്തിയ 109 പേര്‍ക്കും ഇന്ന് രോഗബാധ കണ്ടെത്തി.

ഇന്ന് 278 പേരാണ് രോഗമുക്തി നേടിയത്. തിരുവനന്തപുരം 9, കൊല്ലം 13, പത്തനംതിട്ട 38, ആലപ്പുഴ 19, കോട്ടയം 12, എറണാകുളം 18, തൃശ്ശൂര്‍ 33, ഇടുക്കി 1, പാലക്കാട് 15, മലപ്പുറം 52, കോഴിക്കോട് 14, വയനാട് 4, കാസര്‍കോട് 43 എന്നിങ്ങനെയാണ് കോവിഡ് നെഗറ്റീവായവരുടെ ജില്ല തിരിച്ചുള്ള കണക്ക്.