ഉപ്പും മുളകും സീരിയല്‍ സംവിധായകനെതിരെ രചന നാരായണന്‍കുട്ടി; ഇക്കാരണങ്ങള്‍ പറഞ്ഞ് തന്നെയും ഒഴിവാക്കി

കോഴിക്കോട്: നിഷ സാരംഗിന് പിന്നാലെ ഉപ്പും മുളകും സീരിയല്‍ സംവിധായകന്‍ ആര്‍ ഉണ്ണികൃഷ്ണനെതിരേ ആരോപണവുമായി നടി രചന നാരായണന്‍കുട്ടി രംഗത്ത്. ഉണ്ണികൃഷ്ണന് ഈഗോ പ്രശ്‌നങ്ങളുണ്ടെന്ന് രചന വ്യക്തമാക്കി. താന്‍ സിനിമയില്‍ അഭിനയിക്കാന്‍ തുടങ്ങിയ സമയത്ത് അദ്ദേഹത്തിന് ചില ഈഗോ പ്രശ്‌നങ്ങള്‍ ഉണ്ടായിരുന്നു. ഇതോടെ ഉണ്ണികൃഷ്ണന്‍ സംവിധാനം ചെയ്ത സീരീയലില്‍ നിന്ന് ഒഴിവാക്കി. സീരിയലിന്റെ പിന്നീടുള്ള ഷെഡ്യൂള്‍ മുതല്‍ തൊട്ട് വരേണ്ടെന്ന് തന്നോട് വിളിച്ചു പറഞ്ഞു. തന്നെയും ഒപ്പം വിനോദ് കോവൂരിനേയും അങ്ങനെയാണ് സീരിയലില്‍ നിന്ന് പുറത്താക്കിയത്. വിഷയം നടന്ന സമയത്ത് ഭയങ്കര വിഷമം ഉണ്ടായിരുന്നു. ഇപ്പോള്‍ സംവിധായകന്‍ മോശമായി പെരുമാറിയെന്ന് പറഞ്ഞു രംഗത്തെത്തിയ നിഷ സാരംഗിന് താര സംഘടനയായ അമ്മയുടെ പൂര്‍ണ പിന്തുണയുണ്ടെന്നും രചന കൂട്ടിച്ചേര്‍ത്തു. 

മോശം അനുഭവമുണ്ടായെന്ന് നിഷ വെളിപ്പെടുത്തിയ സാഹചര്യത്തില്‍ ഉണ്ണികൃഷ്ണനെതിരെ വനിതാ കമ്മീഷന്‍ കേസെടുത്തിട്ടുണ്ട്. ശനിയാഴ്ച രാത്രി ഒരു ചാനല്‍ അഭിമുഖത്തിലാണ് നിഷ നിര്‍ണായക വെളിപ്പെടുത്തലുമായി രംഗത്തെത്തിയത്.