തിരുവനന്തപുരം: ലോക്‌സഭാ തെരഞ്ഞടുപ്പില്‍ ഉമ്മന്‍ചാണ്ടി മത്സരിക്കാനുള്ള സാധ്യത തള്ളാതെ എഐസിസി ജനറല്‍ സെക്രട്ടറി മുകുള്‍ വാസ്‌നിക്. സ്ഥാനാര്‍ത്ഥി നിര്‍ണയത്തില്‍ ബൂത്ത് തലം മുതല്‍ കെപിസിസി വരെ ചര്‍ച്ച ചെയ്യുമെന്ന് അദ്ദേഹം പറഞ്ഞു. കോണ്‍ഗ്രസിന് ഏറെ നിര്‍ണായകമാകുന്ന തെരഞ്ഞടുപ്പില്‍ സ്ഥാനാര്‍ത്ഥി നിര്‍ണയത്തില്‍ വിജയസാധ്യത മാത്രമാണ് പരിഗണിക്കുകയെന്ന് നേരത്തെ തന്നെ മുതിര്‍ന്ന നേതാക്കള്‍ വ്യക്തമാക്കിയിരുന്നു.
അതേസമയം ലോക്‌സഭാ തിരഞ്ഞെടുപ്പില്‍ മല്‍സരിക്കില്ലെന്ന സൂചനയാണ് ഉമ്മന്‍ ചാണ്ടി നല്‍കുന്നത്. എംഎല്‍എമാര്‍ മത്സരിക്കേണ്ടതില്ലെന്നാണ് ധാരണ. താനിപ്പോള്‍ എംഎല്‍എയാണെന്നും കൂടുതല്‍ കാര്യങ്ങള്‍ കേരളത്തിലെ നേതാക്കളുമായി ചര്‍ച്ച നടത്തിയശേഷം പ്രതികരിക്കാമെന്നും ഉമ്മന്‍ചാണ്ടി പറഞ്ഞു.
കോണ്‍ഗ്രസിന്റെ തെരഞ്ഞടുപ്പ് ഒരുക്കങ്ങള്‍ വിലയിരുത്താനായാണ് എഐസിസി ജനറല്‍ സെക്രട്ടറി മുകള്‍ വാസ്‌നിക് എത്തിയത്. വാസ്‌നികിന്റെ രണ്ടാംഘട്ട പര്യടനമാണിത്. സ്ഥാനാര്‍ത്ഥി നിര്‍ണയത്തിന് മുന്‍പായി നേതാക്കളുടെ മനസ്സറിയുക എന്നതും സന്ദര്‍ശന ലക്ഷ്യമാണ്. കൊല്ലം പത്തനംതിട്ട, കോട്ടയം,ആലപ്പുഴ എറണാകുളം ജില്ലകളിലും വാസ്‌നിക് പര്യടനം നടത്തും
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
