കെഎസ്‍യു വൈസ് പ്രസിഡന്റ് ആയി; ആര്യയെ സഹപാഠികൾ വാട്സ്ആപ്പ് ഗ്രൂപ്പിൽ നിന്നു പുറത്താക്കി 

തിരുവനന്തപുരം: യൂണിവേഴ്സിറ്റി കോളജിൽ ഇന്നലെ രൂപീകരിച്ച കെഎസ്‌യു യൂണിറ്റിന്റെ ഭാരവാ​ഹിയായതിന് പെൺകുട്ടിയെ വാട്സ്ആപ്പ് ഗ്രൂപ്പുകളിൽ നിന്നു പുറത്താക്കി.  യൂണിറ്റ് വൈസ് പ്രസിഡന്റ് ആര്യയ്ക്ക് നേരെയാണ് സഹപാടികളുടെ നീക്കം. 

കുടപ്പനക്കുന്ന് സ്വദേശിയും യൂണിവേഴ്സിറ്റി കോളജിലെ ബിഎസ്‌സി ബോട്ടണി അവസാന വർഷ വിദ്യാർഥിനിയുമായ ആര്യയെ വൈസ് പ്രസിഡന്റായി തിരഞ്ഞെടുത്തയുടൻ ക്ലാസിലെ വാട്സ്ആപ്പ് ​ഗ്രൂപ്പിൽ നിന്ന് പുറത്താക്കുകയായിരുന്നു. ഇത് ഭാരവാഹികളെയും കോളജിലെ കെഎസ് യു പ്രവർത്തകരെയും മാനസികമായി തളർത്താനുള്ള എസ്എഫ്ഐയുടെ നീക്കമാണെന്നു യൂണിറ്റ് പ്രസിഡന്റ് അമൽ ചന്ദ്രൻ പറഞ്ഞു. 

സംഭവത്തെക്കുറിച്ച് അന്വേഷിക്കുമെന്ന് എസ്എഫ്ഐ ദേശീയ പ്രസിഡന്റ് വി പി സാനു പ്രതികരിച്ചു.