കേരളത്തിന്റെ ചികിത്സാ മാതൃക കേന്ദ്രം ആവശ്യപ്പെട്ടു; കോവിഡിന്റെ സാമൂഹിക വ്യാപനം നടന്നിട്ടില്ല, ഇനിയുള്ള ഒരാഴ്ച നിര്‍ണായകമെന്ന് ആരോഗ്യ മന്ത്രി

തിരുവനന്തപുരം: കോവിഡ് 19ന്റെ സാമൂഹിക വ്യാപനം ഇതുവരെ നടന്നിട്ടില്ലെന്ന് ആരോഗ്യ മന്ത്രി കെ കെ ശൈലജ. വരുന്ന ആഴ്ച നിര്‍ണായകമാണെന്ന് മന്ത്രി പറഞ്ഞു. കോവിഡ് വ്യാപനം അറിയാന്‍ മൂന്നാഴ്ച വേണ്ടിവരുമെന്നും കേരളത്തിന്റെ ചികിത്സാ നടപടികളുടെ മാതൃക കേന്ദ്രം തേടിയിരുന്നുവെന്നും മന്ത്രി കൂട്ടിച്ചേര്‍ത്തു. 

വിദേശത്ത് നിന്ന് എത്തുന്ന ചിലര്‍ ഇപ്പോഴും ക്വാറന്റൈന്‍ പാലിക്കുന്നില്ല. ഇവര്‍ക്കെതിരെ ശക്തമായ നടപടിയുണ്ടാകും. നിരീക്ഷിക്കുന്നവരുടെ എണ്ണം കൂടിയത് ഗള്‍ഫില്‍ നിന്നുള്ളവരുടെ വരവ് മൂലമാണെന്നും മന്ത്രി ചാനല്‍ അഭിമുഖത്തില്‍ പറഞ്ഞു. 

അതേസമയം സംസ്ഥാനത്ത് കോവിഡ് ബാധിച്ചവരുടെ എണ്ണം 126ആയി. വ്യാഴാഴ്ച പത്തൊന്‍പത് പേര്‍ക്ക് രോഗം സ്ഥിരീകരിച്ചു. 9 പേര്‍ കണ്ണൂര്‍ ജില്ലയിലും, കാസര്‍കോട് മലപ്പുറം എന്നിടങ്ങളില്‍ 3പേര്‍ വീതവും തൃശൂരില്‍ 2, ഇടുക്കിയിലും വയനാട്ടിലും ഓരോരുത്തര്‍ എന്നിങ്ങനെയാണ് ഇന്നലെ രോഗം സ്ഥിരികരിച്ചത്.