കൊല്ലത്ത് കാറും സ്കൂട്ടറും കൂട്ടിയിടിച്ച് സ്കൂട്ടർ യാത്രിക മരിച്ചു

കൊല്ലം: ചാത്തന്നൂരിൽ ദേശീയ പാതയിൽ കാറും സ്‌കൂട്ടറും കൂട്ടിയിടിച്ച് സ്‌കൂട്ടർ യാത്രിക മരിച്ചു. ചാത്തന്നൂർ ഇടനാട് ചരുവിള വീട്ടിൽ ബിജു ഡാനിയേലിന്റെ ഭാര്യ ഷേർളി സാമുവേൽ (37) ആണ് മരിച്ചത്. വെള്ളിയാഴ്ച ഉച്ചയ്ക്ക് ഉച്ചയ്ക്ക് 12 മണിയോടെ ചാത്തന്നൂർ പെട്രോൾ പമ്പിന് സമീപത്തെ എസ്ബിഐയ്ക്ക് മുന്നിലാണ് അപകടമുണ്ടായത്. സ്‌കൂട്ടർ ഓടിച്ചിരുന്ന ഭർത്താവിനെ സാരമായ പരിക്കുകളോടെ ആശുപത്രിയിൽ പ്രവേശിപ്പിച്ചു.

ബാങ്കിന് മുന്നിൽ നിന്ന് ഇരുവരും സ്‌കൂട്ടറിൽ റോഡ് മുറിച്ച് കടക്കവെ തിരുമുക്ക് ഭാഗത്ത് നിന്ന് ചാത്തന്നൂരിലേക്ക് പോകുകയായിരുന്ന  കാർ ഇടിക്കുകയായിരുന്നു. ഇടിയുടെ ആഘാതത്തിൽ സ്‌കൂട്ടറിൽ നിന്ന് ഷേർലി ഉയർന്ന് പൊങ്ങി റോഡിലേക്ക് വീണു.

ഗുരുതരമായി പരിക്കേറ്റ ഇരുവരെയും ഉടൻ തന്നെ കൊട്ടിയത്തെ സ്വകാര്യ ആശുപത്രിയിൽ എത്തിച്ചു. ഷേർലിയുടെ പരിക്ക് ഗുരുതരമായതിനാൽ മേവറത്തെ സ്വകാര്യ മെഡിക്കൽ കോളജ് ആശുപത്രിയിൽ എത്തിച്ചെങ്കിലും വൈകിട്ട് 4.30 ഓടെ മരിച്ചു. മക്കൾ: സിബിൻ, സിബിയത്ത്.