കൊച്ചി: തിരുവിതാംകൂര്‍ ദേവസ്വം ബോര്‍ഡിന്റെ കീഴിലുള്ള ക്ഷേത്രങ്ങളില്‍ കോളാമ്പി മൈക്കിന്റെ ഉപയോഗം നിരോധിക്കണമെന്ന് ഹൈക്കോടതി നിര്‍ദേശം. ക്ഷേത്രങ്ങളിലും അനുബന്ധ ചടങ്ങുകളിലും ബോക്‌സ് ടൈപ്പ് സ്പീക്കര്‍ മാത്രം ഉപയോഗിക്കാന്‍ നിര്‍ദേശിച്ച് സര്‍ക്കുലര്‍ ഇറക്കാന്‍ ദേവസ്വം കമ്മിഷണറോട് ഹൈക്കോടതി ഉത്തരവിട്ടു.
ശബ്ദമലിനീകരണം ഉണ്ടാക്കുന്നതിനാല്‍ കോളാമ്പി മൈക്ക് ഉപയോഗം നിരോധിച്ചിട്ടുള്ളതാണെന്നു ചൂണ്ടിക്കാട്ടിയുള്ള ഹര്‍ജിയിലാണ് ഹൈക്കോടതി നടപടി. കോളാമ്പി മൈക്ക് ഒഴിവാക്കുകയാണെന്നും ബോക്‌സ് ടൈപ്പ് സ്പീക്കര്‍ മാത്രമേ ഉപയോഗിക്കുകയുള്ളൂ എന്നും 2014ല്‍ ബോര്‍ഡ് ഉറപ്പുനല്‍കിയിരുന്നുവെന്നും ഹര്‍ജിയില്‍ ബോധിപ്പിച്ചിരുന്നു. മുതുകുളം പാണ്ഡവര്‍ക്കാട് ദേവീക്ഷേത്രത്തില്‍ നവരാത്രി ഉത്സവത്തോട് അനുബന്ധിച്ച് കോളാമ്പി മൈക്ക് ഉപയോഗിക്കുന്നുവെന്നാരോപിച്ച് മുതുകുളം സ്വദേശിയായ എവി മോഹനന്‍ പിള്ളയാണ് ഹര്‍ജി നല്‍കിയത്.
ഇക്കാര്യത്തില്‍ ബോര്‍ഡിനോടും പൊലീസിനോടും കോടതി വിശദീകരണം തേടിയിരുന്നു. ബോക്‌സ് ടൈപ്പ് സ്പീക്കറാണ് ഉപയോഗിക്കുന്നത് എന്ന വിശദീകരമാണ് പൊലീസ് നല്‍കിയത്.
പൊലീസിന്റെയും ബോര്‍ഡിന്റെയും വിശദീകരണം കണക്കിലെടുത്ത കോടതി, അറിഞ്ഞോ അറിയാതെയോ നിയമ ലംഘനങ്ങള്‍ ഉണ്ടാകുന്നുണ്ടെന്നു വിലയിരുത്തിയാണ് പൊതു സര്‍ക്കുലര്‍ പുറപ്പെടുവിക്കാന്‍ ദേവസ്വം കമ്മിഷണര്‍ക്കു നിര്‍ദേശം നല്‍കിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
