ജനശതാബ്ദിക്ക് പുറമെ മം​ഗളയും നേത്രാവതിയും ജൂൺ മുതൽ ഓടും ; ടിക്കറ്റ് ബുക്കിങ് ഇന്നുമുതൽ

ന്യൂഡൽഹി: ലോക്ക്ഡൗണിനെത്തുടർന്ന് നിർത്തിവെച്ചിരുന്ന ട്രെയിൻ സർവീസുകൾ പുനഃരാരംഭിക്കുന്നു.  ജൂൺ ഒന്ന് മുതലാണ് രാജ്യത്ത് ട്രെയിൻ സർവ്വീസ് ഭാഗികമായി തുടങ്ങുന്നത്. സർവ്വീസ് ആരംഭിക്കുന്ന 200 ട്രെയിനുകളുടെ പട്ടികയും സർക്കാർ പുറത്തുവിട്ടു. ഇന്നു മുതൽ ടിക്കറ്റ് ബുക്കിം​ഗ് ആരംഭിക്കുമെന്നും റെയിൽവേ അറിയിച്ചു.

കേരളത്തിൽ കോഴിക്കോട്- തിരുവനന്തപുരം, കണ്ണൂർ-തിരുവനന്തപുരം ജനശതാബ്ദി എക്സ്പ്രസ് ട്രെയിനുകൾ ജൂൺ ഒന്നു മുതൽ സർവീസ് നടത്തും. ഇതിന് പുറമെ, നിസാമുദ്ദീൻ-എറണാകുളം തുരന്തോ എക്സ്പ്രസ്, ഹസ്രത് നിസാമുദ്ദീൻ -എറണാകുളം മം​ഗള എക്സ്പ്രസ്, മുംബൈ-തിരുവനന്തപുരം നേത്രാവതി എക്സ്പ്രസ് എന്നിവയും സർവീസ് നടത്തും.

ആഭ്യന്തര-ആരോഗ്യ മന്ത്രാലയങ്ങളുമായുള്ള ചർച്ചക്ക് ശേഷമാണ് ട്രെയിൻ സർവീസ് ഭാ​ഗികമായി പുനഃരാരംഭിക്കാൻ തീരുമാനിച്ചതെന്ന്  റെയിൽവേ മന്ത്രാലയം അറിയിച്ചു. ഐആർസിടിസി വെബ്സൈറ്റ് മുഖേന ഓൺലൈൻ ബുക്കിങ് മാത്രമാണ് ഉണ്ടാകുക. റെയിൽവേ സ്റ്റേഷനുകളിൽ ബുക്കിങ് ഉണ്ടാകില്ലെന്ന് അധികൃതർ അറിയിച്ചു.