ജിദ്ദയിൽ നിന്നെത്തിയിട്ട് മൂന്നാം ദിനം; കൊറോണ വാർഡിൽ രമ്യക്ക് പെൺകുഞ്ഞ് പിറന്നു 

കോട്ടയം: ക്വാറന്റീനിലായിരുന്ന യുവതി പ്രസവിച്ചു. വിദേശത്തു നിന്ന് എത്തിയ കോട്ടയം അരീക്കര സ്വദേശ്യ രമ്യാമോളാണു (38) ഇന്നലെ വൈകിട്ട് 7.10ന് പെൺകുഞ്ഞിനു ജന്മം നൽകിയത്. 

കോട്ടയം ജനറൽ ആശുപത്രിയിലെ കൊറോണ നിരീക്ഷണ യൂണിറ്റിൽ ഇന്നലെ ഉച്ചയോടെയാണ് രമ്യയെ പ്രവേശിപ്പിച്ചത്. നിരീക്ഷണത്തിലായതിനാൽ കോവിഡ് രോഗിയെ ചികിത്സിക്കുന്ന സുരക്ഷാ നടപടികൾ സ്വീകരിച്ചാണ് പ്രസവ ശസ്ത്രക്രിയ നടത്തിയത്. മുറിയിലേക്കു മാറ്റിയ അമ്മയ്ക്കും കുഞ്ഞിനും ഇതേ സുരക്ഷാ മാനദണ്ഡങ്ങൾ ഉറപ്പാക്കിയിട്ടുണ്ട്.

14-ാം തിയതി വ്യാഴാഴ്ചയാണ് ജിദ്ദയിൽ നിന്നു കൊച്ചിയിലേക്കുള്ള എയർ ഇന്ത്യ വിമാനത്തിൽ രമ്യ നാട്ടിലെത്തിയത്. അരീക്കരയിലെ വീട്ടിലെത്തിയ രമ്യയ്ക്ക് ഭർത്താവ് മനോജാണു സഹായിയായിരുന്നത്. ഇവരുടെ മൂത്ത മകൻ വിനായകനെ (12) രമ്യയുടെ വീട്ടിലേക്കു മാറ്റിയിരുന്നു.