ട്രെയിന്‍ വരുന്നുവെന്ന് ഗേറ്റ് കീപ്പര്‍ക്ക് സന്ദേശമെത്തിയില്ല, വാഹനങ്ങള്‍ ചീറിപ്പായുന്നത് കണ്ട് ലോക്കോ പൈലറ്റ് ട്രെയിന്‍ നിര്‍ത്തി ; ഒഴിവായത് വന്‍ ദുരന്തം

കൊല്ലം: ലോക്കോ പൈലറ്റിന്റെ സമയോചിത ഇടപെടല്‍ കാരണം കൊല്ലത്ത് വന്‍ ദുരന്തം ഒഴിവായി. ഇരവി പുരത്തിന് സമീപം കൂട്ടിക്കടയിലാണ് സംഭവം. മയ്യനാട് സ്റ്റേഷനില്‍ നിന്നും ട്രെയിന്‍ ഇരവിപുരത്ത് എത്തുന്നതിന് മുമ്പായിരുന്നു റെയില്‍വേ ഗേറ്റ് തുറന്ന് കിടന്നത്.

ട്രെയിന്‍ വരുന്നത് കണ്ടിട്ടും വാഹനങ്ങള്‍ പാളം മുറിച്ച് കടക്കുന്നത് ശ്രദ്ധിച്ചപ്പോഴാണ് റെയില്‍വേ ഗേറ്റ് തുറന്ന് കിടക്കുന്നതായി ലോക്കോ പൈലറ്റിന് സംശയം തോന്നിയത്. വേഗത മുഴുവനായും കുറച്ച അദ്ദേഹം യഥാസമയം ട്രെയിന്‍ നിര്‍ത്തുകയായിരുന്നു. ഗേറ്റ് കീപ്പറുടെ മുറിയിലേക്ക് ഓടിയതെത്തി അന്വേഷിച്ചപ്പോഴാണ് ട്രെയിന്‍ വന്ന് കിടക്കുന്നത് അദ്ദേഹും കാണുന്നത്. എന്താണ് സംഭവിച്ചതെന്ന ചോദ്യത്തിന് ട്രെയിന്‍ വരുന്നതായുള്ള വിവരം തനിക്ക് ലഭിച്ചില്ലെന്നായിരുന്നു വിശദീകരണം. 

പിന്നീട് ഗേറ്റ് അടച്ച് സുരക്ഷ ഉറപ്പാക്കിയതിന് ശേഷമാണ് ട്രെയിന്‍ യാത്ര തുടര്‍ന്നത്. സംഭവത്തെ തുടര്‍ന്ന് റെയില്‍വേ അന്വേഷണം ആരംഭിച്ചിട്ടുണ്ട്.