'എം എൻ വിജയൻ' ഫുട്ബോൾ താരം ; നാക്കുപിഴയുമായി വീണ്ടും ഇ പി ജയരാജൻ 

തിരുവനന്തപുരം : ബോക്സിം​ഗ് ഇതിഹാസം മുഹമ്മദാലി മരിച്ചപ്പോൾ, അദ്ദേഹത്തെ കേരളത്തിന്റെ അഭിമാനതാരമാക്കിയ കായികമന്ത്രി ഇ പി ജയരാജൻ അബദ്ധപ്രസം​ഗവുമായി വീണ്ടും. കേരളത്തിലെ പ്രമുഖ ചിന്തകനും അധ്യാപകനുമായിരുന്ന എംഎൻ വിജയനെ ഫുട്ബോൾ താരമാക്കിയാണ് ഇത്തവണ ഇ പി ജയരാജൻ രം​ഗത്തെത്തിയത്. 

യൂത്ത് ലീ​ഗ് നേതാവ് പി കെ ഫിറോസിന്റെ നാക്കുപിഴ, കമ്യൂണിസ്റ്റ് സഖാക്കൾ സോഷ്യൽ മീഡിയയിൽ ആഘോഷിക്കുന്നതിനിടെയാണ് ജയരാജന്റെ പ്രസം​ഗം വൈറലാകുന്നത്.  നിയമസഭയിൽ സംസാരിക്കവെയാണ് ഇ പി ജയരാജന്‍റെ നാക്ക് വീണ്ടും പിഴച്ചത്. മുൻ ഇന്ത്യൻ ഇന്റർനാഷണൽ ഐ എം വിജയന് പകരമാണ്, എം എൻ വിജയനെ മന്ത്രി ഫുട്ബോൾ താരമാക്കിയത്. 

എം എൻ വിജയന് ഒപ്പം ഓടിക്കളിച്ചതിന്‍റെ ഗുണം കോവൂർ കുഞ്ഞുമോന് ഉണ്ടെന്നായിരുന്നു ഇ പി ജയരാജൻ സഭയിൽ പറഞ്ഞത്. ഇതിനിടെ സമീപത്തുള്ളവർ ഐ എം വിജയനെന്ന് മന്ത്രിയെ തിരുത്തുന്നതും  കേൾക്കാം. 

നേരത്തെ ബോക്സിങ് ഇതിഹാസം മുഹമ്മദലി അന്തരിച്ചപ്പോൾ ഒരു ചാനലിന് നൽകിയ പ്രതികരണത്തിലാണ് അദ്ദേഹം കേരളത്തിന്‍റെ അഭിമാനതാരമായിരുന്നുവെന്ന് ജയരാജൻ പറഞ്ഞത്. അന്ന് സമൂഹമാധ്യമങ്ങളിൽ ഉൾപ്പടെ മന്ത്രിക്കെതിരെ ട്രോൾ പെരുമഴയായിരുന്നു.   ഹരിവരാസനത്തിന് പകരം ഗിരിവരാസനം എന്ന് ബിജെപി എം.എൽ.എ ഒ രാജഗോപാൽ പറഞ്ഞതും, ഏറ്റവുമൊടുവിൽ പി കെ ഫിറോസ് പട്ടാമ്പിയിലെ പ്രസംഗത്തിനിടെ രാജീവ് ഗാന്ധി കൊല്ലപ്പെട്ടത്  ശ്രീപെരുമ്പത്തൂർ എന്നതിന് പകരം, കോയമ്പത്തൂരിൽവെച്ചാണെന്ന് പറഞ്ഞതും സോഷ്യൽ മീഡിയയിൽ‌ വൈറലായിരുന്നു.