തിരുവനന്തപുരം: സംസ്ഥാനത്ത് നിലവിലുള്ള ബിരുദ കോഴ്‌സുകള്‍ മൂന്ന് വര്‍ഷമായി തുടരുമെന്ന് മന്ത്രി കെടി ജലീല്‍. ഈ അധ്യയന വര്‍ഷം തുടങ്ങാനിരിക്കുന്ന പുതിയ കോഴ്‌സുകളില്‍ മാത്രമാവും പരിഷ്!കാരങ്ങള്‍ ഏര്‍പ്പെടുത്തുക. ബിരുദ കോഴ്‌സുകള്‍ നാല് വര്‍ഷമാക്കി ഉയര്‍ത്തണമെന്ന് സര്‍ക്കാര്‍ നിയോഗിച്ച വിദഗ്ധ സമിതി ശുപാര്‍ശ നല്‍കിയതിന് പിന്നാലെയാണ് വിശദീകരണം.
പുതിയ 200 കോഴ്‌സുകളാണ് നാല് വര്‍ഷത്തെ ഓണേഴ്‌സ് ഡിഗ്രിയായി മാറുക. പുതുതായി ആയിരം അധ്യാപരെ നിയമിക്കുമെന്നു മന്ത്രി പറഞ്ഞു. ബിരുദവും ബിരുദാനന്തര ബിരുദവും ഒന്നിച്ച് സാധ്യമാകുന്ന ഇന്റഗ്രേറ്റഡ് പിജി കോഴ്‌സുകള്‍ വ്യാപകമാക്കും. കാലിക്കറ്റ് യൂണിവേഴ്‌സിറ്റിയിലെ വിസി നിയമനവുമായി ബന്ധപ്പെട്ട് ഗവര്‍ണര്‍ സമ്മര്‍ദ്ദങ്ങള്‍ക്ക് വഴങ്ങില്ലെന്നാണ് പ്രതീക്ഷ. ഇക്കാര്യത്തില്‍ അടുത്ത ദിവസം തീരുമാനമുണ്ടാകും. സെര്‍ച്ച് കമ്മറ്റി ശുപാര്‍ശ ഗവര്‍ണര്‍ അംഗീകരിക്കുമെന്നാണ് കരുതുന്നതെന്നും ജലീല്‍ കൂട്ടിച്ചേര്‍ത്തു.
സംസ്ഥാനത്ത് നിലവിലുളള ബിരുദ കോഴ്‌സുകള്‍ പലതിനും വിദേശ സര്‍വകലാശാലകളുടെ അംഗീകാരമില്ലെന്നായിരുന്നു സര്‍ക്കാര്‍ നിയോഗിച്ച വിദഗ്ധ സമിതിയുടെ കണ്ടെത്തല്‍. ഈ സാഹചര്യത്തിലാണ് ശാസ്ത്രവിഷയങ്ങളിലടക്കം നാല് വര്‍ഷം ഓണേഴ്‌സ് ബിരുദമെന്ന നിര്‍ദേശം എം ജി സര്‍വകലാശാല വിസി ഡോക്ടര്‍ സാബു തോമസ് അധ്യക്ഷനായ സമിതി സര്‍ക്കാരിന് നല്‍കിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
